Беларусь Республикасининг Янка Купала номидаги Гродно давлат университетида халқаро илмий конференция бўлиб ўтди. Унда қатор давлатларнинг етакчи юридик олий таълим муассасалари ва ҳуқуқни муҳофаза қилиш академиялари вакиллари иштирок этди. Музокаралар марказида рақамлаштириш, технологик ўзгаришлар ва сунъий интеллектнинг ҳуқуқий тизимларга таъсири масалалари турди.
Ўзбекистон Республикаси Ҳуқуқни муҳофаза қилиш академияси мазкур форумда долзарб илмий тадқиқот натижаларини тақдим этди. Докторантлар платформавий бандликни ҳуқуқий тартибга солиш, рақамли иқтисодиёт шароитида бандлик шаклларининг трансформацияси, ходимларни ижтимоий ҳимоя қилиш, шунингдек жиноят ҳуқуқида зўравонлик тушунчасининг назарий ва амалий жиҳатларига бағишланган маърузалар билан иштирок этдилар.
Тақдим этилган илмий ишлар халқаро экспертлар томонидан ижобий баҳоланиб, уларнинг долзарблиги ва амалий аҳамиятини намоён этди ҳамда халқаро илмий ҳамкорликни янада ривожлантириш истиқболларини белгилаб берди.