Ўзбекистон Республикаси Ҳуқуқни муҳофаза қилиш академиясида Амир Темур номидаги Давлат хавфсизлик хизмати академияси раҳбариятининг амалий ташрифи бўлиб ўтди.
Ташриф давомида меҳмонлар Академияда ҳуқуқни муҳофаза қилиш органлари учун тергов ва суриштирув кадрларини тайёрлаш, қайта тайёрлаш ва малака ошириш тизими билан яқиндан танишдилар. Шу билан бирга, прокуратура органлари ходимларининг касбий билим ва амалий кўникмаларини ривожлантиришга қаратилган таълим жараёнлари ҳам алоҳида тақдим этилди.
Меҳмонларга илк бор хизматга қабул қилинган тергов ва суриштирув ходимлари учун мажбурий касбий тайёргарлик курслари, шунингдек раҳбар кадрлар захираси учун ташкил этиладиган махсус қайта тайёрлаш дастурлари мазмун-моҳияти ҳақида маълумот берилди.
Шунингдек, ташриф давомида замонавий ўқув аудиториялари, рақамли таълим инфратузилмаси, криминалистика ва суд экспертизаларига ихтисослашган лабораториялар ҳамда амалий кўникмаларни шакллантиришга қаратилган ўқув-амалий майдонлар кўздан кечирилди.
Учрашув якунида кадрларни тайёрлаш ва уларнинг малакасини ошириш соҳасида ҳамкорликни кенгайтириш, илғор тажрибаларни алмашиш, шунингдек қўшма таълим ва илмий лойиҳаларни амалга ошириш бўйича келишувларга эришилди.