Ҳуқуқни муҳофаза қилиш академиясида прокуратура органларининг ихтисослашган бўлинмалари ходимлари учун комплаенс ва коррупцияга қарши ички назорат тизимини самарали ташкил этиш масалаларига бағишланган навбатдаги қисқа муддатли малака ошириш курси ўтказилди.
Мазкур ўқув дастури прокуратура органларида коррупцияга қарши замонавий ички назорат механизмларини жорий этиш, коррупциявий хавф-хатарларни аниқлаш, баҳолаш ва минималлаштириш, шунингдек, профилактик чораларни кучайтиришга қаратилган.
Тингловчилар прокуратура органларида комплаенс тизимини ташкил этишнинг институционал асослари, коррупциявий хавф-хатарларни баҳолаш ва бошқариш усуллари, халқаро стандартлар ва илғор тажриба, замонавий ахборот технологиялари ва рақамли воситалардан фойдаланиш каби мавзулар бўйича амалий кўникмаларини мустаҳкамлашди.
Ўқув жараёнининг амалий йўналтирилганлигини таъминлаш мақсадида тегишли давлат органларида сайёр ўқув-амалий машғулотлар ташкил этилиб, иштирокчилар коррупциявий хавф-хатарларни баҳолаш ва ички назоратни амалга оширишнинг илғор амалиёти билан танишдилар.
Курс якунида тингловчиларнинг билим ва кўникмалари баҳоланиб, муваффақиятли якунлаган иштирокчиларга белгиланган намунадаги сертификатлар топширилди.