Ҳуқуқни муҳофаза қилиш академияси “Туркий давлатларда суд-ҳуқуқ таълими ва одил судлов: рақамли трансформация ҳамда илғор тажрибалар сари интеграция” мавзусидаги халқаро форумнинг ҳамкори сифатида иштирок этди. Мазкур тадбир Одил судлов академияси томонидан ташкил этилди.
Форумда Ўзбекистон, Озарбайжон, Қозоғистон, Қирғизистон ва Туркия давлатларининг суд-ҳуқуқ таълими муассасалари, прокуратура органлари ҳузуридаги академиялар, шунингдек халқаро ташкилотлар ва экспертлар иштирок этдилар.
Форумнинг очилиш маросимида Ўзбекистон Республикаси Бош прокурори ўринбосари, Ҳуқуқни муҳофаза қилиш академияси бошлиғи вазифасини бажарувчи С.И.Самадов сўзга чиқди. У ўз нутқида мамлакатимизда амалга оширилаётган суд-ҳуқуқ ислоҳотлари кадрлар тайёрлашга сифат жиҳатидан янги ёндашувни талаб этаётганини таъкидлади ҳамда рақамли трансформация, ортиб бораётган профессионал стандартлар ва кенгайиб бораётган халқаро ҳамкорлик шароитида самарали фаолият юрита оладиган кадрларни тайёрлаш муҳим аҳамият касб этишини қайд этди.
Форум доирасида таълим жараёнида рақамли технологиялардан фойдаланиш, судьяларни тайёрлаш ва малакасини оширишда халқаро стандартлар ва илғор ёндашувлар, шунингдек суд ва ҳуқуқни муҳофаза қилиш органлари кадрларини тайёрлашда замонавий педагогик усуллардан самарали фойдаланиш масалаларига бағишланган панель сессиялар ташкил этилди.
Панель сессияларда Ҳуқуқни муҳофаза қилиш академияси ходимлари маърузалар билан иштирок этиб, рақамли ечимлар, халқаро стандартлар ва илғор тажрибалар интеграциясига асосланган кадрлар тайёрлашнинг замонавий ёндашувларини тақдим этдилар, шунингдек суд-ҳуқуқ таълимини янада ривожлантиришнинг устувор йўналишларини белгилаб бердилар.
Форум тажриба алмашиш, долзарб масалаларни муҳокама қилиш ва халқаро ҳамкорликни мустаҳкамлашга хизмат қилувчи самарали мулоқот майдони бўлди.