Ҳуқуқни муҳофаза қилиш академиясида Ўзбекистон Республикаси ва Тожикистон Республикаси олий таълим муассасалари вакиллари иштирокида «Коррупцияга қарши курашиш сиёсатининг ҳуқуқий асослари ва коррупцияга қарши курашиш амалиёти» мавзусида халқаро онлайн конференция бўлиб ўтди.
Тадбир Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти ҳамда Тожикистон Республикасининг Давлат молиявий назорати ва коррупцияга қарши курашиш агентлиги билан ҳамкорликда ташкил этилди.
Конференцияда икки давлатнинг коррупцияга қарши курашиш соҳасидаги ваколатли органлари, олий таълим муассасалари, профессор-ўқитувчилар ва соҳавий мутахассислари иштирок этди.
Тадбир давомида коррупцияга қарши курашиш соҳасида давлат сиёсатининг устувор йўналишлари, соҳада кадрлар тайёрлашнинг замонавий механизмлари, профилактик ёндашувлар ҳамда таълим жараёнига инновацион ечимларни жорий этиш масалалари муҳокама қилинди.
Шунингдек, Академия вакиллари томонидан Коррупцияга қарши курашиш виртуал академиясининг имкониятлари, унинг аҳоли ва мутахассисларнинг ҳуқуқий онги ҳамда антикоррупциявий маданиятини юксалтиришдаги аҳамияти ҳақида тақдимот ўтказилди.
Мазкур халқаро мулоқот коррупцияга қарши курашиш соҳасида ўзаро тажриба алмашиш, илмий-таълимий ҳамкорликни ривожлантириш ва профессионал алоқаларни мустаҳкамлашга хизмат қилди.