Ўзбекистон Республикаси Ҳуқуқни муҳофаза қилиш академиясида Хотира ва қадрлаш куни муносабати билан “Инсон қадри азиз, хотира муқаддас” мавзусида фахрийлар ва талаба-ёшлар иштирокида маънавий-маърифий учрашув ташкил этилди.
Тадбирдан кўзланган асосий мақсад ёш авлодни Ватанга садоқат, миллий ва маънавий қадриятларга ҳурмат руҳида тарбиялаш, тарихий хотирани асраб-авайлаш, шунингдек ҳуқуқни муҳофаза қилиш соҳасида шаклланган касбий анъаналар ва хизмат ворисийлигини мустаҳкамлашдан иборат бўлди.
Учрашув давомида Академия фахрийлари томонидан юртимизда инсон қадрини улуғлаш, тинчлик ва барқарорликни таъминлаш, фидокорона хизмат ва халқ манфаатларига садоқат каби юксак қадриятларнинг мазмун-моҳияти хусусида фикр-мулоҳазалар билдирилди.
Шунингдек, ёшларни ватанпарварлик, юксак масъулият ва дахлдорлик ҳисси асосида тарбиялаш, мамлакат тараққиёти ва жамият хавфсизлигини таъминлашда ҳар бир ходимнинг шахсий масъулиятини англаш масалаларига алоҳида эътибор қаратилди.
Фахрийлар ўзларининг кўп йиллик хизмат фаолияти ва ҳаётий тажрибалари билан ўртоқлашар экан, ҳуқуқни муҳофаза қилиш органларида шаклланган профессионал мактаб, хизмат интизоми ва касбга садоқат анъаналарини сақлаш ҳамда уларни келгуси авлодга етказиш муҳим аҳамият касб этишини таъкидладилар.
Тадбир доирарсида талаба-ёшлар томонидан берилган саволларга атрофлича жавоблар берилиб, очиқ ва самимий мулоқот муҳити шаклланди.