Ўзбекистон Республикаси Ҳуқуқни муҳофаза қилиш академиясида ўтказилган навбатдаги донорлик акциясида Академия раҳбарияти, ходимлари, талабалар ва тингловчилар фаол иштирок этиб, инсон ҳаётини асраш, жамиятда ўзаро меҳр-оқибат ва ҳамжиҳатлик муҳитини мустаҳкамлашга қаратилган эзгу ташаббусни қўллаб-қувватладилар.
Мазкур тадбир Академияда таълим ва касбий тайёргарлик жараёнлари билан бир қаторда ижтимоий масъулият, инсонпарварлик ва фуқаролик бурчи каби қадриятларга ҳам алоҳида эътибор қаратилаётганини намоён этади. Донорлик акцияси иштирокчилари учун бу нафақат тиббий ёрдамга муҳтож инсонларга кўмак бериш, балки жамият олдидаги масъулиятни амалий ҳаракат орқали ифода этиш имконияти бўлди.
Таъкидлаш жоизки, қон донорлиги инсон ҳаётини сақлаб қолишда муҳим аҳамиятга эга бўлиб, бундай ташаббуслар аҳоли саломатлигини муҳофаза қилиш, соғлом ва масъулиятли жамиятни шакллантиришга хизмат қилади. Бу ўз навбатида Бирлашган Миллатлар Ташкилотининг Барқарор ривожланиш мақсадлари, хусусан, саломатлик ва фаровонликни таъминлаш, ижтимоий ҳамжиҳатликни мустаҳкамлаш ҳамда масъулиятли институтларни ривожлантиришга қаратилган мақсадлар билан ҳамоҳангдир.
Академияда бу каби хайрли ташаббусларнинг изчил амалга оширилиши таълим муассасасининг нафақат малакали кадрлар тайёрлаш, балки юксак инсоний фазилатларга эга, жамият тақдирига дахлдор ва ижтимоий масъулиятли шахсларни шакллантиришга қаратилган фаолиятининг муҳим таркибий қисми ҳисобланади.
Донорлик акцияси Академия жамоасининг инсон ҳаёти, саломатлиги ва қадр-қимматига бўлган юксак эътиборини яна бир бор намоён этди.