Ўзбекистон Республикаси Ҳуқуқни муҳофаза қилиш академияси The World University Rankings for Innovation (WURI) 2026 халқаро рейтинги натижаларига кўра дунёнинг етакчи инновацион университетлари қаторидан жой олди.
Мазкур рейтинг олий таълим муассасаларининг инновацияларни ривожлантириш, амалиётга йўналтирилган таълимни жорий этиш, илмий ишланмаларни реал ҳаётга татбиқ қилиш ҳамда жамият тараққиётига қўшаётган ҳиссасини баҳоловчи нуфузли халқаро рейтинглардан бири ҳисобланади.
Баҳолаш натижаларига кўра, Академия WURI 2026 рейтингида “Талабаларни қўллаб-қувватлаш ва уларнинг фаоллигини ошириш” ҳамда “Ишланмаларнинг амалий қўлланилиши” йўналишлари бўйича дунёнинг ТОП-100 университетлари қаторидан ўрин олди.
2026 йилда рейтинг доирасида дунёнинг етакчи университетлари томонидан тақдим этилган 4 866 та кейс баҳоланди. Академия томонидан тақдим этилган лойиҳалар халқаро экспертлар ҳамжамияти томонидан юқори баҳоланиб, амалиётга йўналтирилган таълим, илмий натижаларни амалиётга татбиқ этиш ва ҳуқуқни муҳофаза қилиш фаолиятига замонавий ёндашувларни жорий этиш борасида самарали тажриба сифатида эътироф этилди.
Ушбу натижа Академияда кадрлар тайёрлаш тизимини замонавий талаблар асосида ривожлантириш, таълим жараёнини амалиёт билан узвий боғлаш, талабалар ва тингловчиларнинг ташаббускорлигини қўллаб-қувватлаш ҳамда илмий-амалий ишланмаларни ҳуқуқни муҳофаза қилиш соҳаси эҳтиёжларига йўналтириш борасида амалга оширилаётган ишлар самарасини намоён этади.
WURI 2026 рейтингидаги мазкур эътироф Академиянинг халқаро таълим ва илмий макондаги нуфузи ортиб бораётганини, шунингдек ҳуқуқни муҳофаза қилиш соҳаси учун рақобатбардош, замонавий билим ва амалий кўникмаларга эга кадрларни тайёрлашга қаратилган ислоҳотлар изчил натижа бераётганини тасдиқлайди.