Жорий йилнинг 13–14 май кунлари Молиявий мониторинг бўйича халқаро ўқув-услубий маркази, Иқтисодий жиноятларга қарши курашиш департаменти, Ўзбекистон Республикаси Ҳуқуқни муҳофаза қилиш академияси ҳамда Жиноий фаолиятдан олинган даромадларни легаллаштириш ва терроризмни молиялаштиришга қарши курашиш бўйича Халқаро тармоқ институтига аъзо олий таълим муассасалари иштирокида «Образование и карьера в сфере ПОД/ФТ» халқаро илмий-таълим кўргазмаси ўтказилди.
Тадбир давомида жиноий фаолиятдан олинган даромадларни легаллаштириш ва терроризмни молиялаштиришга қарши курашиш, молиявий хавфсизликни таъминлаш, мазкур йўналишда кадрлар тайёрлаш ҳамда олий таълим муассасаларида бакалавриат ва магистратура босқичларида ўқитилаётган ўқув модуллари, мавзулар ва касбий компетенциялар юзасидан тақдимотлар ўтказилди.
Кўргазма доирасида Молиявий мониторинг бўйича халқаро ўқув-услубий маркази, Иқтисодий жиноятларга қарши курашиш департаменти ҳамда жиноий фаолиятдан олинган даромадларни легаллаштириш ва терроризмни молиялаштиришга қарши курашиш бўйича Халқаро тармоқ институтига аъзо олий таълим муассасалари профессор-ўқитувчилари томонидан молиявий тергов, молиявий хавфсизлик, сунъий интеллектдан фойдаланишнинг ҳуқуқий асослари, фирибгарлик схемалари ва пул маблағларини легаллаштиришнинг эволюцион усулларига бағишланган мастер-класс ва тренинглар ўтказилди.
Амалий машғулотлар доирасида «Графус» дастури орқали жиноий фаолиятдан олинган даромадларни легаллаштириш ҳолатлари бўйича молиявий тергов олиб боришга қаратилган мусобақа ўтказилди. Унда Ҳуқуқни муҳофаза қилиш академияси талабалари жамоаси ғолибликни қўлга киритди.
Шунингдек, «Пул маблағларини легаллаштиришнинг эволюцион схемалари» мавзусида ташкил этилган ўқув машғулоти ва квизда Академия талабалари юқори натижаларга эришди. Жумладан, 3-курс талабаси Амалиддин Раимкулов 2-ўринни, 1-курс талабаси Фазлиддин Баходиров эса фахрли 3-ўринни эгаллади.
Тадбир якунида Молиявий мониторинг бўйича халқаро ўқув-услубий маркази ва Ҳуқуқни муҳофаза қилиш академияси ўртасида жиноий фаолиятдан олинган даромадларни легаллаштириш ҳамда терроризмни молиялаштириш ҳолатлари бўйича молиявий тергов олиб боришда «Графус» дастуридан бепул фойдаланиш юзасидан келишув имзоланди.
Мазкур тадбир молиявий хавфсизлик соҳасида халқаро таълим ва амалий ҳамкорликни ривожлантириш, талабаларнинг касбий кўникмаларини мустаҳкамлаш ҳамда ҳуқуқни муҳофаза қилиш фаолиятида замонавий рақамли воситалардан самарали фойдаланиш имкониятларини кенгайтиришга хизмат қилади.