Ўзбекистон Республикаси Ҳуқуқни муҳофаза қилиш академияси кутубхона фонди Академия ҳамкори – АҚШнинг Шимолий Жоржия университети профессори доктор Мурти Раллапаллининг «Cyber Security and Ethics» («Киберхавфсизлик ва этика») номли китоби билан бойитилди.
Мазкур нашр киберхавфсизлик, ахборот хавфсизлиги, маълумотлар махфийлиги, рақамли муҳитда масъулиятли қарор қабул қилиш ҳамда технологиялардан фойдаланишда этик ёндашувларни шакллантириш каби долзарб масалаларга бағишланган.
Доктор Мурти Раллапалли киберхавфсизлик ва технологиялар соҳасида катта амалий тажрибага эга мутахассис ҳисобланади. У CISSP сертификатига эга бўлиб, фаолияти давомида маълумотлар хавфсизлиги, махфийлик ва замонавий рақамли технологиялар йўналишларида илмий-амалий фаолият олиб борган. Шунингдек, у ахборот хавфсизлиги соҳасидаги техник ечимлар ва нашрлар муаллифи сифатида ҳам танилган.
«Cyber Security and Ethics» китоби рақамли таҳдидлар кучайиб бораётган шароитда киберхавфсизлик, этика, махфийлик ва касбий масъулият ўртасидаги боғлиқликни амалий ёндашув асосида ёритади. Нашр талабалар, тингловчилар, тадқиқотчилар ва профессор-ўқитувчилар учун киберхавфсизлик, рақамли криминалистика, ахборот хавфсизлиги ҳамда рақамли этика йўналишларида фойдали илмий-амалий манба бўлиб хизмат қилади.
Ушбу китобнинг Академия кутубхона фондига киритилиши халқаро экспертлар билан ҳамкорликни ривожлантириш, таълим жараёнини замонавий хорижий манбалар билан бойитиш ҳамда рақамли хавфсизлик соҳасида кадрлар тайёрлаш сифатини оширишга қаратилган ишларнинг амалий ифодасидир.