Ўзбекистон Республикаси Ҳуқуқни муҳофаза қилиш академиясида прокуратура органлари фахрийлари, Академия ходимлари ҳамда бакалавриат талабалари иштирокида “Уч авлод учрашуви” бўлиб ўтди.
Тадбирда прокуратура ва ҳуқуқни муҳофаза қилиш органларида кўп йиллар самарали хизмат қилган генераллар, Ўзбекистон Республикаси прокуратураси фахрийларини ижтимоий қўллаб-қувватлаш жамоатчилик маркази раиси ҳамда Бош прокуратура Жамоатчилик кенгаши раиси иштирок этди.
Самимий ва очиқ мулоқот руҳида кечган учрашувда хизмат бурчига садоқат, касбий ҳалоллик, қонун устуворлиги ва давлат манфаатларини ҳимоя қилишдаги масъулият масалалари муҳокама қилинди. Фахрийлар томонидан кўп йиллик хизмат фаолияти давомида тўпланган ҳаётий ва касбий тажриба, мураккаб вазифаларни ҳал этишдаги ёндашувлар ҳамда касбга фидойилик ҳақида фикрлар ёшлар билан ўртоқлашилди.
Таъкидланганидек, мамлакатимизда ёшларни Ватанга садоқат, ҳалоллик ва юксак маънавий қадриятлар руҳида тарбиялашга алоҳида эътибор қаратилмоқда. Ана шу эзгу ғояларга ҳамоҳанг равишда прокуратура органларида хизмат маданиятини юксалтириш, фахрийлар тажрибасини асраш ва ёш кадрларни маънавий ҳамда касбий жиҳатдан камол топтиришга қаратилган ишлар изчил амалга оширилмоқда.
Қайд этилганидек, Ватанга садоқат ва фидойиликни ўз ҳаёти ҳамда меҳнати билан намоён этган, мамлакат тараққиёти йўлида ибрат мактабини яратган фахрийлар тажрибаси ёш авлод учун муҳим ҳаёт ва хизмат сабоғи ҳисобланади.
Тадбир уч авлод вакилларини бирлаштирган муҳим маънавий ва касбий мулоқот майдонига айланди.