“TASHKENT CYBERLEX – 2026” халқаро илмий-амалий форуми доирасида ташкил этилган учинчи параллел сессия сунъий интеллект ва жиноят судловининг рақамли трансформацияси масалаларига бағишланди.
“Сунъий интеллект ва жиноят процессининг рақамли трансформацияси: тараққиёт, хавф-хатарлар ва шахс ҳуқуқларининг кафолатлари” мавзусида ўтказилган сессия рақамли технологиялар ва ҳуқуқни муҳофаза қилиш амалиёти ўртасидаги ўзаро боғлиқлик тобора кучайиб бораётган шароитда жиноят судлови тизимининг келажагини муҳокама қилишга бағишланган муҳим халқаро эксперт майдонига айланди.
Сессия ишида Ўзбекистон, Туркия, Қозоғистон, Қирғизистон, Тожикистон, Франция, Латвия, Сингапур ва Хитойдан келган олимлар, ҳуқуқни муҳофаза қилувчи органлар вакиллари, халқаро ташкилотлар экспертлари ҳамда рақамли криминалистика соҳаси мутахассислари иштирок этди.
Муҳокамалар марказида сунъий интеллект технологияларини жиноят суд ишларини юритишга жорий этишнинг ҳуқуқий ва амалий жиҳатлари, тергов, прокурор назорати ва суд босқичларининг рақамли трансформацияси, рақамли далилларнинг мақбуллиги ва ишончлилигини таъминлаш, генератив сунъий интеллект шароитида электрон далилларни текшириш механизмлари, шахсга доир маълумотларни муҳофаза қилиш ҳамда махфийлик ҳуқуқини таъминлаш каби долзарб масалалар ўрин олди.
Халқаро экспертлар сунъий интеллект ҳуқуқни муҳофаза қилиш соҳаси учун кенг имкониятлар яратаётгани билан бирга, унинг ҳуқуқий чегаралари, алгоритмик шаффофлик, холислик ва инсон ҳуқуқларини таъминлаш билан боғлиқ масалалар ҳам глобал кун тартибининг ажралмас қисмига айланганини таъкидладилар.
Сессия иштирокчилари жиноят процессини рақамлаштириш ва сунъий интеллект технологияларини ҳуқуқни қўллаш амалиётига жорий этишда қонунийлик, шаффофлик, ҳисобдорлик ва инсон ҳуқуқларига қатъий риоя қилиш устувор аҳамият касб этишини қайд этдилар.
Муҳокамалар давомида миллий қонунчиликни халқаро стандартлар билан уйғунлаштириш, рақамли технологиялардан фойдаланишнинг ҳуқуқий кафолатларини мустаҳкамлаш ҳамда сунъий интеллектдан хавфсиз ва масъулиятли фойдаланиш бўйича қатор амалий таклиф ва ёндашувлар илгари сурилди.
Таъкидланганидек, сунъий интеллект жиноят судлови тизими учун фақат технологик янгилик эмас, балки ҳуқуқий фикрлаш, далиллар билан ишлаш ва инсон ҳуқуқларини ҳимоя қилиш механизмларини қайта кўриб чиқишни талаб этадиган янги ҳуқуқий воқеликдир.
Учинчи параллел сессия “TASHKENT CYBERLEX – 2026” форумининг энг долзарб ва стратегик аҳамиятга эга муҳокама майдонларидан бири сифатида сунъий интеллект ва жиноят судловининг рақамли келажаги бўйича илмий ёндашувлар, халқаро тажриба ва амалий ечимларни бирлаштирди.