Ҳуқуқни муҳофаза қилиш академиясида “Рақамли даврда қонун устуворлигини таъминлаш: инновациялар, инсон ҳуқуқлари ва хавфсизлик мутаносиблиги” мавзусидаги “TASHKENT CYBERLEX – 2026” халқаро илмий-амалий форуми доирасида “Киберхавфсизликни ҳуқуқий таъминлаш ва ахборот технологиялари соҳасидаги жиноятларга қарши курашишни такомиллаштириш истиқболлари” мавзусида давра суҳбати ўтказилди.
Давра суҳбати рақамли трансформация шароитида киберхавфсизликни таъминлаш, ахборот технологиялари соҳасидаги жиноятларга қарши самарали курашиш ҳамда қонун устуворлиги, инсон ҳуқуқлари ва хавфсизлик ўртасидаги мувозанатни сақлашнинг долзарб масалаларини муҳокама қилишга қаратилган муҳим эксперт мулоқот майдонига айланди.
Тадбирда ҳуқуқни муҳофаза қилувчи органлар, илмий ва таълим муассасалари вакиллари, соҳавий мутахассислар ҳамда экспертлар иштирок этиб, кибержиноятчиликка қарши курашиш соҳасидаги миллий ва халқаро ёндашувлар, ҳуқуқий механизмларни такомиллаштириш ҳамда рақамли муҳитда хавфсизликни таъминлашнинг замонавий моделлари хусусида фикр алмашдилар.
Муҳокамалар марказида ахборот технологиялари соҳасидаги жиноятларни аниқлаш ва тергов қилиш амалиёти, рақамли далиллар билан ишлашнинг ҳуқуқий ва процессуал жиҳатлари, киберхавфсизлик соҳасида халқаро ҳамкорликни кенгайтириш, шунингдек ҳуқуқни қўллаш амалиётига инновацион ёндашувлар ва технологияларни жорий этиш масалалари ўрин олди.
Таъкидланганидек, рақамли технологиялар тараққиёти янги имкониятлар билан бир қаторда кибержиноятчиликнинг янада мураккаб ва трансмиллий шаклларини ҳам юзага келтирмоқда. Шу боис, мазкур соҳада ҳуқуқий тартибга солишни такомиллаштириш, мутахассислар салоҳиятини ошириш ва халқаро ҳамкорлик механизмларини мустаҳкамлаш бугунги куннинг муҳим вазифаларидан бири ҳисобланади.
Давра суҳбати иштирокчилари киберхавфсизлик соҳасида илмий, амалий ва ҳуқуқий ёндашувларни уйғунлаштириш, ахборот технологиялари соҳасидаги жиноятларга қарши курашиш самарадорлигини ошириш ҳамда рақамли даврда қонун устуворлигини таъминлаш бўйича қатор таклиф ва тавсияларни илгари сурдилар.
Мазкур тадбир “TASHKENT CYBERLEX – 2026” форуми доирасида киберхавфсизлик ва рақамли ҳуқуқ соҳасида профессионал мулоқотни ривожлантириш, ҳуқуқий механизмларни такомиллаштириш ва халқаро ҳамкорликни мустаҳкамлашга хизмат қилувчи муҳим эксперт платформаларидан бири сифатида аҳамият касб этди.