“TASHKENT CYBERLEX – 2026” халқаро илмий-амалий форуми доирасида хорижий ва миллий ҳамкорлар билан қатор икки томонлама учрашувлар ҳамда эксперт мулоқотлари ўтказилди.
Мазкур мулоқотлар форумнинг нафақат илмий ва эксперт муҳокамалар майдони, балки халқаро институционал ҳамкорликни мустаҳкамлаш, тажриба алмашиш ва истиқболли қўшма ташаббусларни илгари суришга хизмат қилувчи муҳим мулоқот платформаси сифатидаги аҳамиятини яна бир бор намоён этди.
Хусусан, Япония Адлия вазирлиги делегацияси билан бўлиб ўтган учрашувда ҳуқуқий таълим, кадрлар тайёрлаш, ўзаро тажриба алмашиш ва қўшма лойиҳаларни амалга оширишнинг истиқболли йўналишлари муҳокама қилинди. Томонлар рақамли трансформация шароитида ҳуқуқни муҳофаза қилиш соҳасидаги ҳамкорликни янада кенгайтиришдан манфаатдор эканини таъкидладилар.
Шунингдек, Пекин Халқ прокуратураси делегацияси вакиллари билан ўтказилган мулоқотда прокуратура органлари ўртасидаги профессионал алоқаларни мустаҳкамлаш, ҳуқуқий тадқиқотлар ва академик ҳамкорликни ривожлантириш, шунингдек қўшма ташаббус ва амалий лойиҳаларни рўёбга чиқариш истиқболлари кўриб чиқилди.
Таъкидланганидек, рақамли технологиялар ва трансмиллий кибертаҳдидлар шароитида ҳуқуқни муҳофаза қилиш соҳасидаги самарали ҳамкорлик, билим ва тажриба алмашинуви халқаро мулоқотнинг муҳим йўналишларидан бири ҳисобланади.
“TASHKENT CYBERLEX – 2026” форуми доирасидаги икки томонлама учрашувлар ўзаро ишонч ва институционал шерикликни мустаҳкамлаш, ҳуқуқий ва эксперт ҳамкорликнинг янги йўналишларини шакллантириш ҳамда халқаро мулоқотни янада ривожлантиришга хизмат қилмоқда.