“TASHKENT CYBERLEX – 2026” халқаро илмий-амалий форуми доирасида ўтказилган икки томонлама учрашувлар ва эксперт мулоқотлари амалий натижалар билан якунланиб, Ўзбекистон Республикаси Ҳуқуқни муҳофаза қилиш академияси ва ҳамкор ташкилотлар ўртасида қатор ўзаро ҳамкорлик меморандумлари имзоланди.
Имзоланган ҳужжатлар таълим, илмий тадқиқотлар, рақамли технологиялар ва ҳуқуқни муҳофаза қилиш соҳаларидаги ҳамкорликни янада мустаҳкамлаш, қўшма ташаббуслар ва академик-эксперт алмашинувларни кенгайтиришга қаратилгани билан аҳамиятлидир.
Хусусан, Қозоғистон Республикаси Ички ишлар вазирлигининг Шрақбек Қобилбаев номидаги Қостанай академияси, Рақамли технологиялар ва сунъий интеллектни ривожлантириш илмий-тадқиқот институти ҳамда “Логос” илмий-таълим маркази билан ҳамкорлик ҳужжатлари расмийлаштирилди.
Мазкур келишувлар ҳуқуқий таълим ва илмий тадқиқотларни ривожлантириш, рақамли технологиялар соҳасида ҳамкорликни кенгайтириш, инновацион ёндашувларни амалиётга жорий этиш ҳамда кадрлар салоҳиятини оширишга қаратилган қўшма лойиҳаларни амалга ошириш учун янги имкониятлар яратади.
Қайд этилганидек, замонавий ҳуқуқий ва технологик чақириқлар шароитида институционал ҳамкорликни мустаҳкамлаш, академик ва эксперт алоқаларни кенгайтириш ҳамда билимлар интеграциясига таянган шериклик муносабатларини ривожлантириш тобора муҳим аҳамият касб этмоқда.
Имзоланган меморандумлар “TASHKENT CYBERLEX – 2026” форумининг амалий натижаларга йўналтирилган халқаро платформа сифатидаги мақомини янада мустаҳкамлаб, ҳуқуқий таълим, рақамли ривожланиш ва ҳуқуқни муҳофаза қилиш соҳаларида узоқ муддатли ҳамкорлик учун мустаҳкам асос яратади.