Ўзбекистон Республикаси Ҳуқуқни муҳофаза қилиш академиясида китобхонлик маданиятини юксалтириш, ёшларни мутолаага кенг жалб этиш, маънавий-маърифий муҳитни мустаҳкамлаш ҳамда илм-маърифатга асосланган интеллектуал муҳитни қарор топтиришга қаратилган тизимли ишлар доирасида навбатдаги китоб ярмаркаси ташкил этилди.
Мазкур тадбир Академияда илм-маърифат, интеллектуал ривожланиш ва юксак маънавий қадриятларни қарор топтиришга қаратилган саъй-ҳаракатларнинг узвий қисми сифатида профессор-ўқитувчилар, тингловчилар, талабалар ва Академия ходимларини бирлаштирган маърифий мулоқот майдонига айланди.
Ярмарка иштирокчилари ҳуқуқшунослик, тарих, психология, бадиий адабиёт, болалар адабиёти, маънавият ҳамда замонавий илм-фан соҳаларига оид юзлаб китоблар билан танишиш, ўз қизиқиш ва эҳтиёжларига мос адабиётларни танлаш имкониятига эга бўлдилар.
Таъкидланганидек, китоб нафақат билим ва ахборот манбаи, балки мустақил фикрлаш, ҳуқуқий тафаккур, маънавий баркамоллик ва инсоннинг ички дунёси шаклланишида муҳим ўрин тутади. Айниқса, ҳуқуқшунос кадрларни тайёрлаш жараёнида мутолаа маданияти касбий билим, таҳлилий фикрлаш ва масъулиятли дунёқарашни қарор топтиришнинг муҳим омилларидан бири ҳисобланади.
Академияда китобхонлик маданиятини ривожлантиришга қаратилган бундай анъанавий тадбирлар ёш авлоднинг интеллектуал салоҳияти ва маънавий камолотини юксалтириш, уларда билимга ҳурмат, миллий ва умуминсоний қадриятларга садоқат ҳамда юксак фуқаролик масъулиятини мустаҳкамлашга хизмат қилмоқда.