Ўзбекистон Республикаси Ҳуқуқни муҳофаза қилиш академиясида Бирлашган Миллатлар Ташкилотининг Инсон ҳуқуқлари бўйича олий комиссари бошқармасининг (OHCHR) Марказий Осиё бўйича минтақавий бўлими вакиллари билан учрашув бўлиб ўтди.
Учрашув инсон ҳуқуқларини ҳимоя қилиш ва рағбатлантириш, ҳуқуқни қўллаш амалиётига халқаро стандартларни самарали жорий этиш ҳамда ҳуқуқни муҳофаза қилиш органлари ходимларининг инсон ҳуқуқлари соҳасидаги касбий салоҳиятини янада ошириш масалаларига бағишланди.
Ташриф доирасида меҳмонлар Академиянинг кўп тармоқли фаолияти, прокуратура ва тергов органлари учун кадрлар тайёрлаш, қайта тайёрлаш ва малака оширишнинг замонавий тизими билан танишдилар. Шунингдек, таълим жараёнига замонавий педагогик ёндашувлар, амалий кўникмаларни шакллантиришга қаратилган механизмлар ҳамда инсон ҳуқуқлари соҳасидаги ўқув дастурларининг мазмуни ҳақида маълумот берилди.
Мулоқот чоғида инсон ҳуқуқларини таъминлаш соҳасидаги халқаро тажриба, ҳуқуқни қўллаш амалиётида инсон ҳуқуқлари стандартларини мустаҳкамлаш, таълим ва тадқиқот соҳасидаги ҳамкорликни кенгайтириш масалалари юзасидан фикр алмашилди.
Томонлар Академия ва OHCHR ўртасидаги ҳамкорликни янада ривожлантириш, қўшма таълим ва илмий-тадқиқот ташаббусларини қўллаб-қувватлаш ҳамда инсон ҳуқуқлари соҳасида кадрлар тайёрлаш сифатини янада оширишдан манфаатдор эканликларини таъкидладилар.
Учрашув инсон ҳуқуқларини таъминлаш соҳасидаги халқаро ҳамкорликни мустаҳкамлаш, илғор тажриба ва билимлар алмашинувини кенгайтириш ҳамда ҳуқуқни муҳофаза қилиш органлари учун юқори малакали кадрлар тайёрлаш бўйича саъй-ҳаракатларни изчил давом эттиришга хизмат қилди.