Ўзбекистон Республикаси Ҳуқуқни муҳофаза қилиш академиясида “Тергов фаолияти” ва “Прокурорлик фаолияти” таълим йўналишларида таҳсил олаётган 2-босқич талабалари ўртасида “Ёш терговчилар” клубига аъзоликка қабул қилиш бўйича саралаш синови ташкил этилди.
Тадбирнинг мақсади талабаларнинг жиноят ҳуқуқи ва жиноят-процессуал ҳуқуқи соҳасидаги билимлари, таҳлилий ва мантиқий фикрлаш қобилияти, ҳуқуқий тафаккури ҳамда келгусидаги касбий фаолиятга бўлган қизиқиш ва интилишларини баҳолашдан иборат бўлди.
Синов жараёнлари очиқлик ва шаффофлик тамойиллари асосида ўтказилиб, иштирокчилар назарий саволларга жавоб бериш билан бир қаторда амалий ва мантиқий топшириқларни ҳам бажардилар. Бу эса талабаларнинг нафақат билим даражаси, балки касбий вазиятларни таҳлил қилиш ва асосли қарор қабул қилиш кўникмаларини баҳолаш имконини берди.
Саралаш натижаларига кўра юқори билим, интеллектуал салоҳият ва фаол фуқаролик позициясини намоён этган талабалар “Ёш терговчилар” клуби аъзолигига тавсия этилди.
Қайд этилганидек, мазкур клуб доирасида талабаларнинг касбий компетенцияларини ривожлантириш, амалий кўникмаларини мустаҳкамлаш, соҳанинг етакчи мутахассислари билан учрашувлар ташкил этиш ҳамда бўлажак терговчиларнинг лидерлик ва таҳлилий салоҳиятини юксалтиришга қаратилган тадбирлар мунтазам ўтказиб борилади.
“Ёш терговчилар” клуби Академияда юқори малакали, кенг дунёқарашга эга ва замонавий талабларга жавоб берадиган ҳуқуқни муҳофаза қилиш органлари кадрларини тайёрлашга қаратилган тизимли ишларининг муҳим таркибий қисми ҳисобланади.