Ҳуқуқни муҳофаза қилиш органлари фаолияти самарадорлигини ошириш, жиноятларни тезкор ва сифатли тергов қилиш ҳамда замонавий компетенцияларга эга кадрларни тайёрлаш бугунги давлат сиёсатининг устувор йўналишларидан бири ҳисобланади.
Шу мақсадда Ҳуқуқни муҳофаза қилиш академияси томонидан ҳуқуқни муҳофаза қилувчи органлар фаолиятига илмий-методик кўмак кўрсатиш, таълим ва амалиёт интеграциясини кучайтириш, шунингдек тергов фаолиятига илғор криминалистик ва рақамли технологияларни кенг жорий этиш бўйича тизимли ишлар амалга оширилмоқда.
Академия бошлиғининг биринчи ўринбосари Е.В.Коленко Тошкент шаҳри Бектемир тумани прокуратурасида бўлиб, жиноятларни иссиқ изидан фош этиш, тергов сифати ва самарадорлигини ошириш, замонавий криминалистик техника ва технологиялардан фойдаланиш бўйича яратилган шарт-шароитлар билан танишди.
Учрашув давомида тергов амалиётида учраётган долзарб масалалар муҳокама қилиниб, рақамли технологияларни кенг жорий этиш, криминалистик таъминотни кучайтириш, тергов ҳаракатлари сифати ва натижадорлигини ошириш ҳамда кадрларни тайёрлаш ва қайта тайёрлаш тизимини такомиллаштириш юзасидан илмий-амалий тавсиялар берилди.
Ҳуқуқни муҳофаза қилиш академияси томонидан жойларда амалга оширилаётган бундай ўрганишлар тергов органлари фаолиятини илмий асосда такомиллаштириш, илғор тажрибаларни амалиётга татбиқ этиш ва юқори малакали мутахассислар тайёрлашга хизмат қилмоқда.