Ўзбекистон Республикаси давлат мустақиллигининг 35 йиллигига бағишланган тадбирлар доирасида Ҳуқуқни муҳофаза қилиш академиясида Республика Маънавият ва маърифат маркази ҳамда Маърифат тарғиботчилар жамияти билан ҳамкорликда «Мустақиллик соати» ўқув-семинари ташкил этилди.
Тадбир «Ягона Ватан, ягона халқ бўлиб, янги ҳаёт ва келажак яратамиз!» бош ғояси асосида ўтказилди.
Унда Республика Маънавият ва маърифат маркази ҳузуридаги Маърифат тарғиботчилар жамияти аъзоси, тарих фанлари доктори, профессор А.Маврулов, Академия профессор-ўқитувчилари, тьюторлар, талабалар, шунингдек, таълим муассасалари вакиллари иштирок этди.
Семинар давомида мамлакатимиз мустақиллик йилларида эришган ютуқлар, Янги Ўзбекистон тараққиёт стратегияси доирасида амалга оширилаётган кенг кўламли ислоҳотлар ҳамда ёшларнинг мамлакат келажагини барпо этишдаги ўрни ва масъулияти хусусида фикр алмашилди.
Таъкидланганидек, «Ягона Ватан, ягона халқ бўлиб, янги ҳаёт ва келажак яратамиз!» ғояси жамиятдаги бирдамлик ва ҳамжиҳатликни мустаҳкамлаш, турли миллат ва элат вакилларини умумий мақсадлар йўлида бирлаштириш, Ватан тараққиётига дахлдорлик ҳиссини юксалтиришга хизмат қилмоқда.
Очиқ мулоқот шаклида ўтган тадбирда мустақилликнинг мазмун-моҳияти, фуқаролик масъулияти, ёшларнинг интеллектуал ва маънавий салоҳиятини ривожлантириш масалалари муҳокама қилинди. Иштирокчилар томонидан мамлакат тараққиётига муносиб ҳисса қўшиш, миллий қадриятларни асраб-авайлаш ва юрт равнақига хизмат қилишга қаратилган фикр ва таклифлар билдирилди.