Ўзбекистон Республикаси Ҳуқуқни муҳофаза қилиш академиясида Тожикистон Республикаси Давлат молиявий назорати ва коррупцияга қарши курашиш агентлиги директорининг ўринбосари Сулаймон Талбакзода бошчилигидаги делегация билан учрашув бўлиб ўтди.
Учрашувда Академия бошлиғи ўринбосари Уйғун Нигмаджанов, Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти вакиллари ҳамда Тожикистон делегацияси аъзолари иштирок этди.
Тадбир давомида меҳмонларга Академиянинг асосий фаолият йўналишлари, кадрлар тайёрлаш тизими ва таълим жараёнига жорий этилган замонавий ёндашувлар ҳақида маълумот берилди.
Хусусан, рақамли криминалистика соҳасидаги амалий ишлар, Виртуал академия платформаси орқали коррупцияга қарши курашиш масалалари бўйича ташкил этилган масофавий таълим имкониятлари, таълим ва таҳлил жараёнларида сунъий интеллект технологияларидан фойдаланиш тажрибаси, шунингдек, ситуацион кабинетлар, имитацион аудиториялар ва «Даркнет» муҳитидаги маълумотларни таҳлил қилиш бўйича амалга оширилаётган ишлар тақдим этилди.
Учрашув чоғида коррупцияга қарши курашиш, молиявий назорат, кадрлар тайёрлаш ва малака ошириш соҳаларида тажриба алмашишнинг истиқболли йўналишлари муҳокама қилинди.
Томонлар ҳамкорликни янада кенгайтириш, жумладан Тожикистон Республикаси Давлат молиявий назорати ва коррупцияга қарши курашиш агентлиги ходимлари учун Академия базасида масофавий таълим дастурларини ташкил этиш ҳамда икки томонлама ҳамкорлик меморандумини имзолаш имкониятларини кўриб чиқдилар.
Учрашув якунида меҳмонлар таълим, илмий-таҳлилий фаолият ва халқаро ҳамкорликни ривожлантириш соҳаларида ўзаро алоқаларни мустаҳкамлашдан манфаатдор эканликларини таъкидладилар.