Ўзбекистон Республикаси Ҳуқуқни муҳофаза қилиш академияси раҳбарияти иштирокида Жамоат хавфсизлиги университетида Ҳуқуқни муҳофаза қилувчи органлар олий таълим муассасалари консорциумини ташкил этишга бағишланган тантанали маросим бўлиб ўтди.
Тадбирда Ўзбекистон Республикаси Президенти Администрацияси, Олий таълим, фан ва инновациялар вазирлиги, халқаро ташкилотлар вакиллари, шунингдек Консорциумга аъзо таълим муассасалари – Ўзбекистон Республикаси Ҳуқуқни муҳофаза қилиш академияси, Ички ишлар вазирлиги академияси, Жамоат хавфсизлиги университети, Божхона қўмитасининг Божхона институти ҳамда Фавқулодда вазиятлар вазирлиги академияси раҳбарияти, соҳа экспертлари ва масъул ходимлари иштирок этди.
Консорциумнинг асосий мақсади ҳуқуқни муҳофаза қилувчи органлар учун халқаро стандартларга мос, юқори малакали, ҳалол ва ватанпарвар кадрлар тайёрлайдиган замонавий таълим тизимини шакллантиришдан иборат. Тадбир доирасида тақдим этилган «2030 йил стратегияси»да тизимни амалиётга йўналтирилган, рақамли технологиялар ва сунъий интеллектга асосланган, минтақада етакчи ҳамда халқаро миқёсда эътироф этилган кадрлар тайёрлаш марказига айлантириш устувор вазифа сифатида белгиланди.
Муҳокамалар жараёнида таълим ва инфратузилмани ривожлантириш, жумладан Ягона компетенциялар модели (CCF)ни жорий этиш, инновацион технологияларни кенг татбиқ қилиш, аъзо таълим муассасаларининг кутубхона, лаборатория ва симуляцион полигонларидан ўзаро фойдаланиш имкониятларини яратиш масалаларига алоҳида эътибор қаратилди. Шунингдек, таълим экотизимига рақамли трансформация ва сунъий интеллект ечимларини интеграция қилиш, ягона LMS платформаси, электрон портфолио ҳамда VR/AR технологияларидан кенг фойдаланиш бўйича вазифалар белгиланди.
Тадбирда киберкриминалистика, коррупцияга қарши курашиш, Crowd Management ва рақамли таҳлил йўналишларида ихтисослаштирилган марказлар фаолиятини йўлга қўйиш, INTERPOL, CEPOL ва UNODC каби халқаро ташкилотлар билан қўшма тадқиқотлар ўтказиш ҳамда қўшма таълим дастурларини амалга ошириш истиқболлари муҳокама қилинди. Қайд этилганидек, мазкур ташаббус ҳуқуқни муҳофаза қилувчи органлар учун кадрлар тайёрлаш тизимини янги босқичга олиб чиқиш, таълим муассасаларининг халқаро нуфузини ошириш ва соҳадаги институционал ҳамкорликни мустаҳкамлашга хизмат қилади.