Ҳуқуқни муҳофаза қилиш академияси томонидан ёшлар ўртасида коррупцияга қарши маданиятни шакллантириш, уларда ҳалоллик, қонунга ҳурмат ва фуқаролик масъулиятини мустаҳкамлашга қаратилган маърифий тадбирлар изчил равишда амалга оширилмоқда.
Шу каби тадбирлардан навбатдагиси Тошкент шаҳар прокуратураси билан ҳамкорликда Ўзбекистон Миллий университетида “Коррупцияга қарши авлод” мавзусида ташкил этилди.
Тадбирда Ҳуқуқни муҳофаза қилиш академияси, Тошкент шаҳар прокуратураси ва Тошкент шаҳар Ички ишлар бош бошқармаси ходимлари, университет профессор-ўқитувчилари, талабалар ҳамда тадқиқотчилар иштирок этдилар.
Учрашув давомида коррупциянинг давлат ва жамият тараққиётига салбий таъсири, унинг олдини олишнинг самарали механизмлари, ёшларнинг коррупцияга қарши курашишдаги ўрни ва масъулияти, шунингдек, уларда коррупцияга нисбатан муросасиз муносабатни шакллантириш масалалари муҳокама қилинди.
Академиянинг Коррупцияга қарши курашиш илмий-таълим маркази ходими томонидан коррупцияга қарши курашишнинг замонавий ёндашувлари, мазкур жараёнда ёшларнинг фаол иштироки, ҳалоллик маданиятини қарор топтириш ҳамда коррупцияга қарши таълимнинг аҳамиятига бағишланган тақдимот ўтказилди.
Тадбир иштирокчилари билан очиқ мулоқот шаклида ташкил этилган муҳокамалар давомида ҳуқуқбузарликлар ва жиноятларнинг олдини олиш, ҳуқуқий маданиятни юксалтириш ҳамда ёшларнинг фаол фуқаролик позициясини шакллантириш масалалари юзасидан фикр алмашилди.
Бундай тадбирлар ёшларни коррупцияга қарши курашиш ғояларига кенг жалб этиш, уларда ҳалоллик, масъулият ва қонун устуворлиги тамойилларига содиқликни мустаҳкамлаш, шунингдек, ҳуқуқий онг ва ҳуқуқий маданиятни юксалтиришга хизмат қилмоқда.