Ўзбекистон Республикаси Ҳуқуқни муҳофаза қилиш академиясида 2026/2027 ўқув йили учун бакалавриат таълим йўналишларига қабул давом этмоқда.
Жорий ўқув йилида абитуриентлар “Юриспруденция” ҳамда илк бор ташкил этилган “Киберҳуқуқ” бакалавриат таълим йўналишлари бўйича ўқиш имкониятига эга бўладилар.
“Юриспруденция” йўналиши бўйича кадрлар тайёрлаш Академияда 2023/2024 ўқув йилидан бошлаб амалга ошириб келинмоқда. Янги “Киберҳуқуқ” таълим йўналиши эса Ўзбекистон Республикаси Президентининг “Рақамли прокуратура – 2030” стратегияси доирасида жорий этилган бўлиб, рақамли ҳуқуқ, киберхавфсизлик ва замонавий ахборот технологиялари соҳасида юқори малакали мутахассисларни тайёрлашга қаратилган.
Академия бакалавриатида таълим ўзбек ва рус тилларида давлат гранти ҳамда тўлов-контракт асосида ташкил этилади.
“Юриспруденция” ва “Киберҳуқуқ” таълим йўналишлари бўйича танловда иштирок этувчи номзодлар жорий йилнинг 5 июнидан 25 июнига қадар (25 июнь куни ҳам) my.uzbmb.uz сайтидаги “Олий ва касбий (профессионал) таълим ташкилотларига қабул (2026/2027 ўқув йили учун)” бўлими орқали тест синовлари учун фанлар мажмуасини (“Давлат ва ҳуқуқ асослари” ва “Чет тили”), таълим тилини, чет тилини ҳамда тест синовлари ўтказиладиган ҳудудни танлашлари лозим.
Тест синовларини июль ойида ўтказиш режалаштирилган.
Шунингдек, номзодлар тегишли сертификатларни электрон тизим орқали юклашлари мумкин.
Ҳуқуқни муҳофаза қилиш академияси бакалавриатига кириш имтиҳонлари билан боғлиқ янгиликлар билан Академиянинг расмий веб-сайти (www.proacademy.uz) ҳамда қуйидаги ижтимоий тармоқлардаги расмий саҳифалари орқали танишиб боришингиз мумкин:
www.facebook.com/ProsecutorAcademy;
www.instagram.com/proacademyuz/;