Ўзбекистон Республикаси Президентининг 2026 йил 8 июндаги “Судларда комплаенс назорат тизими самарадорлигини оширишнинг қўшимча чора-тадбирлари тўғрисида”ги ПФ–106-сон Фармонида белгиланган вазифалар ижросини таъминлаш, хусусан, суд тизимида комплаенс назорат тизимини самарали йўлга қўйиш ҳамда ходимларнинг малакасини ошириш масалалари бўйича Ҳуқуқни муҳофаза қилиш академиясида Ўзбекистон Республикаси Одил судлов академияси вакиллари билан консультатив учрашув бўлиб ўтди.
Учрашув давомида меҳмонлар Ҳуқуқни муҳофаза қилиш академиясида коррупцияга қарши курашиш соҳасида амалга оширилаётган ишлар, жумладан, “Коррупцияга қарши курашиш виртуал академияси” электрон платформаси орқали давлат хизматчилари учун ташкил этилаётган малака ошириш курслари, шунингдек, тизим ходимларининг коррупцияга қарши барқарорлик даражасини баҳолаш механизмлари билан яқиндан таништирилди.
Мулоқот чоғида коррупцияга қарши курашиш соҳасида кадрлар тайёрлаш, малака ошириш ва илғор тажрибаларни жорий этиш масалалари муҳокама қилинди. Шунингдек, мазкур йўналишларда ўзаро ҳамкорликни янада ривожлантириш бўйича фикр алмашилди.
Учрашув якунида томонлар келгусида коррупцияга қарши курашиш ва комплаенс назорат тизимини такомиллаштириш соҳаларида ҳамкорликни кенгайтиришга келишиб олдилар.