Ҳуқуқни муҳофаза қилиш академиясида прокуратура органларида раҳбарлик лавозимларини эгаллаш учун заҳирага киритилган кадрларни тайёрлаш жараёнида назарий билимларни амалий фаолият билан уйғунлаштиришга қаратилган сайёр ўқув машғулотлари изчил давом эттирилмоқда.
Навбатдаги амалий машғулот Тошкент шаҳар ИИББ Ҳуқуқбузарликлар профилактикаси бошқармасининг Вояга етмаганларга ижтимоий-ҳуқуқий ёрдам кўрсатиш марказида ташкил этилди.
Машғулот давомида тингловчилар марказнинг фаолият йўналишлари, асосий вазифа ва функциялари, шунингдек, қийин ҳаётий вазиятга тушиб қолган вояга етмаганларга кўрсатилаётган ижтимоий, психологик ва ҳуқуқий ёрдам тизими ҳамда мазкур йўналишда яратилган шарт-шароитлар билан танишдилар.
Шунингдек, иштирокчилар вояга етмаганлар билан профилактик ва индивидуал ишлаш амалиёти, давлат органлари ҳамда бошқа ташкилотлар ўртасидаги ҳамкорлик механизмлари, болалар манфаатларини ҳимоя қилишга қаратилган чора-тадбирларнинг амалий жиҳатлари юзасидан маълумотларга эга бўлдилар.
Мутахассислар иштирокида ўтказилган мулоқот давомида тингловчилар ўзларини қизиқтирган саволларга атрофлича жавоб олдилар ҳамда муассасанинг фаолияти, моддий-техник базаси ва яратилган шарт-шароитлар билан яқиндан танишдилар.
Бундай амалий машғулотлар раҳбар кадрлар заҳирасини тайёрлаш жараёнида тингловчиларнинг касбий дунёқарашини кенгайтириш, бошқарув кўникмаларини мустаҳкамлаш ҳамда болалар ҳуқуқларини ҳимоя қилиш соҳасидаги илғор тажрибаларни ўрганишга хизмат қилмоқда.