Ўзбекистон Республикаси Ҳуқуқни муҳофаза қилиш академиясида профессор-ўқитувчиларнинг касбий салоҳиятини юксалтириш, ўқув жараёнига замонавий педагогик технологиялар ва инновацион ёндашувларни кенг жорий этишга қаратилган тизимли ишлар изчил давом эттирилмоқда. Шу мақсадда навбатдаги маҳорат дарси ташкил этилди.
Тадбир Ўзбекистон давлат жаҳон тиллари университети Педагогика ва психология кафедраси доцент вазифасини бажарувчиси, педагогика фанлари бўйича фалсафа доктори (PhD) Рашидова Зулайҳо Олимжон қизи томонидан олиб борилди.
Машғулот давомида ўқув жараёнини интерактив таълим асосида ташкил этиш, замонавий педагогик технологиялар ва илғор инновацияларни таълим жараёнига самарали жорий этиш, шунингдек, таълим сифати ва профессор-ўқитувчиларнинг касбий маҳоратини янада ошириш масалаларига алоҳида эътибор қаратилди.
Шунингдек, замонавий таълим усулларидан фойдаланиш, тингловчилар фаоллигини оширишга қаратилган интерактив ёндашувлар ҳамда таълим жараёнини самарали ташкил этишнинг амалий жиҳатлари юзасидан фикр алмашилди.
Бундай тадбирлар Академияда таълим жараёнини такомиллаштириш, инновацион ёндашувларни кенг жорий этиш ҳамда профессор-ўқитувчиларнинг педагогик компетенцияларини янада ривожлантиришга хизмат қилади.