Ўзбекистон Республикаси Ҳуқуқни муҳофаза қилиш академияси томонидан ёш авлодда коррупцияга нисбатан муросасиз муносабатни шакллантириш, ҳуқуқий онг ва ҳуқуқий маданиятни юксалтиришга қаратилган тизимли ишлар изчил амалга оширилмоқда. Ана шундай тадбирлардан навбатдагиси Божхона қўмитаси ҳузуридаги Божхона институти курсантлари иштирокида ташкил этилди.
Ўқув машғулоти Ҳуқуқни муҳофаза қилиш академияси Коррупцияга қарши курашиш илмий-таълим маркази вакиллари томонидан “Ўзбекистонда коррупция кўринишларига қарши курашишнинг долзарблиги” мавзусида олиб борилди.
Тадбир давомида иштирокчиларга мамлакатимизда коррупцияга қарши курашиш соҳасида амалга оширилаётган тизимли ислоҳотлар, коррупциянинг жамият ва давлат тараққиётига салбий таъсири, шунингдек, коррупциянинг олдини олишга қаратилган замонавий механизмлар хусусида батафсил маълумот берилди.
Шу билан бирга, курсантларга келгусида хизмат вазифаларини бажариш жараёнида касбий этика, ҳалоллик, холислик ва қонун устуворлиги тамойилларига қатъий риоя қилиш муҳим аҳамият касб этиши алоҳида таъкидланди.
Тадбир доирасида иштирокчилар билан очиқ мулоқот ташкил этилиб, уларни қизиқтирган саволларга атрофлича жавоблар берилди.
Бундай тадбирлар ёш кадрларда коррупцияга қарши маданиятни шакллантириш, уларнинг ҳуқуқий саводхонлигини ошириш ҳамда ҳалоллик ва масъулият тамойилларига асосланган касбий дунёқарашни мустаҳкамлашга хизмат қилади.