30 июнь – Ёшлар куни арафасида Ўзбекистон Республикаси Ҳуқуқни муҳофаза қилиш академиясида «Ёшлар оқшоми» маданий-маърифий байрам тадбири ўтказилди. Тадбир дастури ёшларнинг интеллектуал, ижодий ва жисмоний салоҳиятини қўллаб-қувватлаш, ватанпарварлик, жамоавийлик ва соғлом рақобат муҳитини мустаҳкамлашга қаратилди.
Тадбирни очиб берган Академия раҳбарияти мамлакатимизда ёшларга яратилаётган кенг имкониятлар, уларнинг давлат ва жамият ҳаётидаги фаол иштироки, шунингдек, мамлакатнинг келгуси тараққиётига қўшаётган ҳиссаси муҳим эканини алоҳида таъкидлади.
Байрам дастурининг марказий воқеаларидан бири PUBG Mobile киберспорт мусобақаси бўлди. Унда иштирокчилар стратегик фикрлаш, тезкор қарор қабул қилиш ва жамоада ҳамжиҳат ҳаракат қилиш кўникмаларини намоён этиб, мусобақага катта қизиқиш билдирдилар.
Тадбир якунида таълим, илм-фан, спорт ва жамоат ишларида юқори натижаларга эришаётган, турли танлов ва мусобақаларда фаол иштирок этаётган ёшлар муносиб тақдирланди.
Маданий-маърифий дастур, киберспорт мусобақаси ва тақдирлаш маросимини бирлаштирган «Ёшлар оқшоми» ёшларнинг ютуқларини эътироф этиш, Академия жамоасидаги дўстлик, ҳамжиҳатлик ва жамоавийлик руҳини янада мустаҳкамлашга хизмат қилди.