Ўзбекистон Республикаси Ҳуқуқни муҳофаза қилиш академияси Ахборот-ресурс маркази фонди ҳуқуқшунослик соҳасидаги таълим ва илмий изланишларни қўллаб-қувватлашга хизмат қиладиган янги адабиётлар билан бойитилди.
Жумладан, фонд «Маъмурий ҳуқуқ ва процесс», «Давлат ва ҳуқуқ тарихи», «Конституциявий ҳуқуқ», «Суд ва ҳуқуқни муҳофаза қилувчи органлар. Адвокатура» номли ўқув нашрлари, шунингдек, Ўзбекистон Республикасининг «Тезкор-қидирув фаолияти тўғрисида»ги Қонунига илмий-амалий шарҳ билан тўлдирилди.
Мазкур адабиётлар талабалар, тингловчилар, профессор-ўқитувчилар, илмий изланувчилар ҳамда ҳуқуқни қўллаш амалиёти билан шуғулланувчи мутахассислар учун муҳим манба бўлиб хизмат қилади. Уларда ҳуқуқий институтларнинг назарий асослари, миллий қонунчиликнинг ривожланиш босқичлари, суд ва ҳуқуқни муҳофаза қилувчи органлар фаолияти, шунингдек, ҳуқуқий амалиётнинг долзарб масалалари ёритилган.
Айниқса, «Тезкор-қидирув фаолияти тўғрисида»ги Қонунга илмий-амалий шарҳ ушбу фаолиятнинг ҳуқуқий асосларини ўрганиш, қонун нормаларини тўғри талқин қилиш ва уларни амалиётда бир хил қўллаш масалаларида муҳим аҳамият касб этади.
Фонднинг замонавий ҳуқуқий адабиётлар билан мунтазам бойитиб борилиши Академияда таълим сифати ва илмий тадқиқотлар самарадорлигини ошириш, тингловчиларнинг мустақил таълим олиш имкониятларини кенгайтиришга хизмат қилади.
Ахборот-ресурс маркази барча китобхонларни янги келиб тушган адабиётлар билан танишиш ва улардан ўқув, илмий ҳамда касбий фаолиятда самарали фойдаланишга таклиф этади.