Ҳуқуқни муҳофаза қилиш академияси экспертлари Бош прокуратура раҳбарияти ҳамда Иқтисодий жиноятларга қарши курашиш департаменти ва Мажбурий ижро бюросининг масъул ходимлари билан биргаликда Ўзбекистонда 2024–2025 йилларда коррупцияга қарши курашиш соҳасида амалга оширилган ислоҳотларнинг натижаларини ИҲТТ мониторинг гуруҳи вакиллари билан муҳокама қилди.
Учрашувлар Иқтисодий ҳамкорлик ва тараққиёт ташкилоти Коррупцияга қарши курашиш тармоғининг Истанбул ҳаракатлар режаси бўйича 5-раунд мониторинги иккинчи босқичи доирасида ИҲТТ Котибияти мониторинг гуруҳи вакилларининг Ўзбекистонга ташрифи давомида ўтказилди.
Мониторинг жараёнида Бош прокуратура масъул бўлган учта йўналиш – прокуратура органлари мустақиллиги, коррупцияга қарши курашишга ихтисослаштирилган институтлар ҳамда коррупцияга оид жиноятлар учун жавобгарлик соҳаларида 2024–2025 йилларда амалга оширилган ишлар баҳоланди.
Учрашувларда прокуратура органлари мустақиллигини янада мустаҳкамлаш, коррупцияга қарши курашишга ихтисослаштирилган тузилмаларда институционал ислоҳотларни давом эттириш, шунингдек, коррупцияга оид жиноятлар учун жавобгарлик механизмларини халқаро стандартларга мувофиқлаштиришга доир ИҲТТ тавсияларининг ижроси атрофлича муҳокама қилинди.
ИҲТТ Котибияти мониторинг гуруҳи соҳада амалга оширилган ижобий ўзгаришлар ва сўнгги ислоҳотларни эътироф этди. Шу билан бирга, баҳолаш йўналишларидаги ишларни янада жадаллаштириш юзасидан амалий тавсиялар билдирилди.
Маълумот учун: Истанбул ҳаракатлар режаси ИҲТТнинг Шарқий Европа ва Марказий Осиё мамлакатлари учун Коррупцияга қарши курашиш тармоғи доирасидаги минтақавий дастур ҳисобланади. Унда Арманистон, Озарбайжон, Грузия, Қозоғистон, Қирғиз Республикаси, Молдова, Мўғулистон, Тожикистон, Украина ва Ўзбекистон иштирок этади. Дастур доирасида иштирокчи давлатларда коррупцияга қарши курашиш бўйича халқаро стандартларнинг миллий амалиётга жорий этилиши мунтазам баҳоланади.