Ўзбекистон Республикаси Ҳуқуқни муҳофаза қилиш академияси Тожикистон Республикаси Давлат молиявий назорати ва коррупцияга қарши курашиш агентлиги ходимлари учун активларни қайтаришнинг халқаро механизмлари ва ваколатли органлар ўртасидаги амалий ҳамкорликка бағишланган махсус онлайн-семинар ташкил этди.
Тадбирда Академия бошлиғининг ўринбосари У.У. Нигмаджанов маъруза қилиб, жиноий йўл билан олинган активларни қайтаришнинг халқаро механизмлари, бу жараёнда идоралараро тармоқларнинг ўрни ҳамда ваколатли органлар ўртасида самарали ҳамкорликни йўлга қўйишнинг амалий жиҳатларини ёритди.
Семинар Тожикистон Республикаси Давлат молиявий назорати ва коррупцияга қарши курашиш агентлиги директори ўринбосари С. Талбакзода бошчилигидаги делегациянинг жорий йил 5 июнь куни Академияга ташрифи доирасида эришилган келишувларнинг амалий давоми бўлди.
Мазкур учрашувда томонлар коррупцияга қарши курашиш ва жиноий активларни қайтариш соҳаларида профессионал алоқаларни ривожлантириш, кадрлар тайёрлаш ва уларнинг малакасини ошириш, шунингдек, илғор тажриба алмашиш бўйича ҳамкорликни кенгайтиришга келишиб олган эди.
Онлайн-семинар давомида активларни қайтариш бўйича идоралараро тармоқлар имкониятларидан фойдаланиш, халқаро ҳамкорлик самарадорлигини ошириш, норасмий ҳамкорлик механизмларини қўллаш ва ваколатли органлар ўртасида тезкор ахборот алмашинувини таъминлаш масалалари кўриб чиқилди.
Ғарбий ва Марказий Осиё давлатларининг активларни қайтариш бўйича идоралараро тармоғи – ARIN-WCA фаолиятига алоҳида эътибор қаратилди. Иштирокчиларга тармоқнинг мақсад ва вазифалари, унинг имкониятларидан фойдаланиш тартиби, аъзо давлатларнинг ваколатли органлари ўртасида профессионал алоқаларни ўрнатиш механизмлари, шунингдек, халқаро ҳамкорлик доирасида сўровларни тайёрлаш ва юборишнинг ҳуқуқий ҳамда амалий жиҳатлари тақдим этилди.
Тадбир якунида ўтказилган фикр алмашуви давомида активларни қайтариш механизмларини амалиётда қўллаш ва ARIN-WCA доирасидаги ҳамкорликни янада ривожлантиришга доир саволлар муҳокама қилинди.
Семинар Ўзбекистон Республикаси Ҳуқуқни муҳофаза қилиш академияси ва Тожикистон Республикаси Давлат молиявий назорати ва коррупцияга қарши курашиш агентлиги ўртасидаги профессионал ва академик ҳамкорликни мустаҳкамлаш, ўзаро тажриба алмашиш ҳамда коррупцияга қарши курашиш ва жиноий активларни қайтариш соҳасида мутахассислар салоҳиятини оширишга хизмат қилди.