Олий таълим ташкилотлари ва таълим йўналишларини танлашнинг иккинчи босқичи давом этмоқда. Тест синовларида иштирок этган абитуриентлар 8 августга қадар, шу куни ҳам, my.uzbmb.uz электрон платформасида таълим шаклини инобатга олган ҳолда олий таълим ташкилоти ва таълим йўналиши бўйича бештагача танловни амалга оширишлари мумкин.
2026/2027 ўқув йили учун Ўзбекистон Республикаси Ҳуқуқни муҳофаза қилиш академиясида қуйидаги бакалавриат таълим йўналишлари бўйича қабул амалга оширилмоқда:
– «Юриспруденция (Прокурорлик фаолияти)»;
– «Киберҳуқуқ».
«Юриспруденция (Прокурорлик фаолияти)» йўналиши қонунчиликни пухта эгаллаган, инсон ҳуқуқ ва эркинликларини ҳимоя қилиш, қонунийликни таъминлаш ҳамда ҳуқуқни қўллаш амалиётида самарали фаолият юритишга тайёр ҳуқуқшуносларни тайёрлашга қаратилган.
«Киберҳуқуқ» йўналишида рақамли муҳитни ҳуқуқий тартибга солиш, кибержиноятчиликка қарши курашиш, рақамли далиллар билан ишлаш ва замонавий технологияларни қўллашнинг ҳуқуқий жиҳатлари бўйича мутахассислар тайёрланади.
Ҳар икки йўналишда ўқиш муддати – 4 йил. Таълим ўзбек ва рус тилларида давлат гранти ҳамда тўлов-контракт асосида ташкил этилади. «Юриспруденция (Прокурорлик фаолияти)» йўналишида кундузги ва масофавий, «Киберҳуқуқ» йўналишида эса кундузги таълим шакли мавжуд.
Академияда таълим назарий билимларни ҳуқуқни қўллаш амалиёти билан уйғунлаштиришга асосланган. Ўқув жараёнига соҳанинг тажрибали амалиётчилари, миллий ва хорижий экспертлар жалб этилиб, талабаларнинг таҳлилий фикрлаши, касбий ва рақамли кўникмаларини ривожлантиришга алоҳида эътибор қаратилади.
Касбий келажагингизни қонун устуворлиги, адолат ва рақамли хавфсизликни таъминлаш билан боғланг – Ўзбекистон Республикаси Ҳуқуқни муҳофаза қилиш академиясини танланг!
Танловни my.uzbmb.uz платформасида сақлаш ва SMS-код орқали тасдиқлашни унутманг.
Қабул жараёнига оид янгиликлар Академиянинг расмий веб-сайти https://proacademy.uz/ ҳамда Telegram’даги расмий саҳифаси – t.me/TheLawEnforcementAcademy орқали эълон қилиб борилади.