Прокуратура органлари фаолиятини психологик таъминлашнинг самарадорлигини ошириш масалалари юзасидан халқаро ҳамкорлик

Бош прокуратура Академиясининг М.В.Ломоносов номидаги Москва давлат университети ва унинг Тошкентдаги филиали билан ҳамкорлик доирасида  28-30 январь кунлари Академияда МДУ профессори, психология фанлари доктори Т.Ю.Базаров иштирокида қатор тадбирлар ўтказилди.

Ишчи учрашувлар давомида прокуратура органларини психологик таъминлашнинг ривожланиши масалалари, прокурор-тергов кадрларининг касбий муҳим сифатлари ва компетенциялари психодиагностикаси муаммолари кўриб чиқилди.

Т.Ю.Базаров Академиянинг Психологик таъминлаш бўлимига умумий, устувор компетенцияларни операционал белгиланиши, прокуратура органлари ходимларининг компетенцияларини баҳолаш индикаторлари, мезонлари, методлари ва ахборот манбасини аниқлашга доир консультатив ёрдам кўрсатди.

Шунингдек, тадбирларда прокурор компетенциясининг таҳлили, касбий ва этник хусусиятларни инобатга олган ҳолда психологик методикаларни саралаш ва мослаштириш, прокуратура органларига муносиб кадрларни танлаш, бошқарув кадрлар заҳирасини шакллантириш, Академиянинг Ассесмент-марказини яратиш каби масалалар муҳокама этилди.

Бундан ташқари, профессор Т.Ю.Базаров Академиянинг профессор-ўқитувчилик таркиби ҳамда тингловчилар учун инсоний ресурсларни  бошқариш, жамоадаги шахслараро муносабатларни такомиллаштиришга оид лекциялар ўтказди.

Иштирокчилар ўртасида, режавий топшириқларни бажариш жараёнида турли шарт-шароитларда инсоний ресурсларни самарали бошқариш, ходимлар мотивациясини ошириш ва шунга тааллуқли муаммолар муҳокама қилинди.

Т.Ю.Базаровнинг учрашувлардаги самимийлиги ва сидқидиллиги Академия ходимлари ва тингловчиларда чуқур таассурот қолдирди.