Жиноятларни олдини олиш тизимини такомиллаштириш: Академия ва БМТ ГЖБнинг ҳамкорликдаги саъй-ҳаракатлари

Бош прокуратура Академияси томонидан жиноятчилик сабабларини тизимли таҳлил қилишнинг сифати ҳамда жамоат хавфсизлигининг самарадорлигини ошириш мақсадида 2019 йил 1 февраль куни БМТнинг Гиёҳванд моддалар ва жиноятчилик бўйича ҳудудий бошқармаси ҳалқаро экспертлари иштирокида бир қатор тадбирлар ўтказилди.

Хусусан, Бош прокуратураси Академиясининг Жиноятларнинг содир этилиши сабабларини тизимли таҳлил қилиш ва ўрганиш маркази, ички ишлар, халқ таълими, жисмоний тарбия ва спорт вазирликлари вакиллари, Тошкент шаҳар ҳудудий прокуратура ходимлари, ИИВ Академияси ва ИИВ Малака ошириш институтининг профессор-ўқитувчилари учун “Жамоат хавфсизлиги ва жиноятчиликни олдини олиш соҳасида ҳалқаро стандартлар ва илғор тажриба” мавзусидаги давра суҳбати ташкил этилди.

Тадбирда БМТ ГЖБнинг минтақавий вакили Ашита Миттал, Ўрта Осиёда жиноий одил судлов бўйича БМТ ГЖБнинг дастури координатори Кун Маркверинг иштирок этишди. Халқаро экспертлар сифатида Жиноятчиликнинг олдини олиш ва жиноий одил судлов бўйича Венадаги БМТ ГЖБ ходими Йоханнес Де Хаан ҳамда “Гражданский Союз” ижтимоий уюшмаси (Қирғизистон) раисдоши Тимур Шайхутдиновлар қатнашишди.

Давра суҳбати иштирокчилари Ўзбекистон Республикасида жиноятларнинг олдини олиш тизимини такомиллаштиришдаги чора-тадбирлар билан танишиб, жамоат хавфсизлигини таъминлашда халқаро ҳамда қирғизистон тажрибасини кўриб чиқишди.

Куннинг иккинчи ярмида Йоханнес Де Хаан ва БМТ ГЖБнинг минтақавий ваколатхонаси ходимлари Тошкент шаҳар Чилонзор туманининг ҳуқуқбузарликлар профилактикаси соҳасидаги фаолият билан танишишди.

Туманда жиноятчилик содир этилиши сабабларини тизимли таҳлил қилиш эксперт-таҳлил гуруҳи аъзолари билан ўтказилган учрашув чоғида, соҳадаги “Йўл харитаси”ни амалга ошириш масалалари муҳокама қилинди. БМТ ГЖБ вакиллари соҳага ахборот технологияларини фаол тадбиқ этиш ва жамоатчиликни жалб қилиш борасидаги амалий чора-тадбирларнинг замонавий талабларга тўлиқ жавоб беришини таъкидлаб ўтишди.

Ташрифдан сўнг Бош прокуратура Академиясида ишчи учрашуви ташкиллаштирилиб, томонлар жиноятларнинг олдини олиш тизимини илғор халқаро тажриба асосида ривожлантириш мақсадида ҳамкорликда лойиҳа ишлаб чиқиш ва амалга ошириш масаларини муҳокама қилишди.