Ғарбий ва Марказий Осиё давлатларининг активларни қайтариш бўйича идоралараро тармоғига (ARIN-WCA) берилган кузатувчи мақоми унинг халқаро профессионал мулоқотдаги иштирокини кенгайтириш, хорижий давлатларнинг коррупцияга қарши курашувчи ва ҳуқуқни муҳофаза қилувчи органлари билан амалий алоқаларни ривожлантириш имконини беради. ARIN-WCA доимий котибияти вазифасини Ўзбекистон Республикаси Ҳуқуқни муҳофаза қилиш академияси бажаради.
Тармоққа янги мақом берилгани ҳақида 25–28 август кунлари Вена шаҳридаги БМТнинг Наркотиклар ва жиноятчилик бўйича бошқармаси штаб-квартирасида ўтказилган GlobE Networkнинг еттинчи ялпи йиғилишида эълон қилинди. Йиғилишда ARIN-WCA доимий котибияти номидан Академия бошлиғининг ўринбосари У. У. Нигмаджанов иштирок этди.
Муҳокамаларда трансчегаравий ҳамкорликнинг амалий механизмларига асосий эътибор қаратилди. Хусусан, тезкор ва ҳимояланган ахборот алмашинуви, халқаро тусдаги коррупцияга оид жиноятларни тергов қилишда ваколатли органларнинг ҳамкорлиги, шунингдек, жиноий активларни излаш ва қайтариш масалалари кўриб чиқилди. GlobE Networkнинг минтақавий профессионал тармоқлар билан шериклигини кенгайтириш истиқболлари ҳам алоҳида муҳокама қилинди.
Янги мақом ARIN-WCAга GlobE Network фаолиятида иштирок этиш, минтақа давлатларининг умумий устувор йўналишларини илгари суриш ва бошқа юрисдикцияларнинг ваколатли органлари билан ҳамкорликни ривожлантириш учун қўшимча имкониятлар яратади. Доимий котибият вазифасини бажараётган Академия учун эса бу қўшма ташаббусларни илгари суриш, халқаро тажрибани жалб этиш ва тармоқнинг амалий салоҳиятини мустаҳкамлаш имкониятларини кенгайтиради.
Маълумот учун: GlobE Network 137 давлатнинг коррупцияга қарши курашувчи, ҳуқуқни муҳофаза қилувчи ва бошқа 253 та ваколатли органини бирлаштиради. Тармоқ тўғридан-тўғри профессионал алоқаларни йўлга қўйиш, ахборотни хавфсиз алмашиш ҳамда трансмиллий коррупцияга оид жиноятларни тергов қилишда амалий ҳамкорликни ривожлантиришга хизмат қилади.