Қирғизистон Республикасининг Иссиқкўл вилоятида “Учувчисиз авиация тизимларининг рақамли криминалистикаси” мавзусида беш кунлик минтақавий тренинг бўлиб ўтди. Тадбирда Ўзбекистон Республикаси Ҳуқуқни муҳофаза қилиш академияси эксперти иштирок этди.
Тренинг CADAP-8 дастури доирасида Европа Иттифоқи ва БМТнинг Гиёҳвандлик ва жиноятчилик бўйича бошқармаси ҳамкорлигида ташкил этилди.
Дастур рақамли криминалистиканинг ихтисослашган йўналиши – учувчисиз учиш қурилмаларидаги рақамли маълумотлар билан ишлаш масалаларига бағишланди.
Назарий ва амалий машғулотлар доирасида иштирокчилар учувчисиз учиш қурилмаларидан рақамли маълумотларни криминалистик талабларга мувофиқ олиш ва таҳлил қилиш бўйича билим ҳамда кўникмаларга эга бўлдилар.
Академия эксперти томонидан олинган билим ва кўникмалар рақамли криминалистика соҳасидаги илмий-тадқиқот ва амалий фаолиятда қўлланилиб, учувчисиз авиация тизимларининг рақамли криминалистикаси бўйича янги илмий-амалий ишланмаларни ривожлантиришга хизмат қилади.