Ўзбекистон Республикаси Ҳуқуқни муҳофаза қилиш академиясида ташкил этилган START WEEK дастурида 300 нафардан ортиқ биринчи босқич талабаси иштирок этди. Ҳафталик давомида улар Академия муҳити ва мавжуд имкониятлар билан яқиндан танишиб, янги ўқув жараёнига мослашиш имконига эга бўлди.

Дастур доирасида психологик тренинглар, спорт мусобақалари, интеллектуал ва мусиқий танловлар ҳамда турли жамоавий ўйинлар ўтказилди.

Тадбирлар давомида талабаларнинг нафақат билими, балки кенг дунёқараши, зукколиги ва ижодий қобилиятлари ҳам намоён бўлди. Психологик тренинглар ва жамоавий ўйинлар уларнинг ўзаро мулоқот қилиши, бир-бири билан яқиндан танишиши ҳамда жамоа бўлиб ишлаши учун имконият яратди.

Мазкур ҳафталик талабаларни ўзаро яқинлаштириб, улар ўртасида дўстлик, ҳамжиҳатлик ва жамоавийлик муҳитини шакллантиришга хизмат қилди. START WEEK биринчи босқич талабалари учун янги муҳит билан танишувдан ягона жамоа сифатида шаклланиш сари дастлабки қадам бўлди.