Тренерларни тайёрлашга қаратилган тренингда Ўзбекистон Республикаси Бош прокуратураси ходимлари, Ўзбекистон Республикаси Олий суди судьялари, Ўзбекистон Республикаси Ҳуқуқни муҳофаза қилиш академияси ходимлари, Самарқанд вилояти прокуратураси ходимлари ва терговчилари, Самарқанд вилоятидаги жиноят ишлари бўйича судлар судьялари ҳамда ижтимоий соҳа ходимлари иштирок этди.

Тренинг “Ўзбекистон Республикасида “Барнаҳус” тизимида вояга етмаганларни тергов сўроғидан ўтказиш” мавзусига бағишланди. Тадбирнинг асосий мақсади бола ҳуқуқларини ҳимоя қилишнинг илғор халқаро стандарти ҳисобланган “Барнаҳус” моделини миллий амалиётга самарали жорий этиш ҳамда мутахассисларнинг сўроқ жараёнида вояга етмаганларнинг руҳий хавфсизлигини таъминлаш, уларнинг қайта руҳий жароҳатланиши ва иккиламчи виктимизациясининг олдини олишга доир касбий кўникмаларини оширишдан иборат бўлди.

Машғулотларда вояга етмаган жабрланувчилар ва гувоҳларнинг ҳуқуқлари ҳамда қонуний манфаатларини ҳимоя қилишга оид халқаро стандартлар ва миллий қонунчилик талаблари кўриб чиқилди. Шунингдек, бола ҳуқуқлари ва болалар учун дўстона одил судлов, вояга етмаган жабрланувчи ва гувоҳларни процессуал ҳаракатларга психологик тайёрлаш ҳамда уларни сўроқ қилишнинг ўзига хос жиҳатлари ёритилди.

Иштирокчилар амалий кейслар асосида NICHD-R баённомасининг асослари ва ундаги саволлар типологияси, болалар билан ишлайдиган терговчи ва судьялар учун мулоқот психологияси ҳамда босимсиз муҳит яратиш усулларини ўрганди. NICHD-R баённомаси асосида сўроқ ўтказиш тартиби намойиш этилди, шунингдек, “Барнаҳус” тизимида соҳа ходимларини ўқитишда интерфаол ва замонавий ёндашувлардан фойдаланиш масалалари кўриб чиқилди.

Тренинг якунида иштирокчиларга белгиланган тартибда сертификатлар топширилди.