Ўзбекистон Республикаси Ҳуқуқни муҳофаза қилиш академияси жамоаси тадқиқот лойиҳалари бўйича илк миллий Capstone Project танловининг финал босқичида иккинчи ўринни эгаллади. Финал Инсон ҳуқуқлари бўйича V Самарқанд форуми арафасида бўлиб ўтди.

Совринли ўринлар учун ҳуқуқшунослик ва ҳуқуқни муҳофаза қилиш йўналишларида таълим берадиган олий таълим муассасаларидан тўққизта жамоа беллашди. Академия талабалари инсон ҳуқуқлари ва ҳуқуқни қўллаш амалиётининг долзарб масалаларига оид тадқиқотларини тақдим этди. Ҳакамлар ҳайъати ушбу ишларнинг долзарблиги, хулосаларнинг илмий асосланганлиги ва таклиф этилган тавсияларнинг амалий йўналишини қайд этди.

Capstone Project – талабаларнинг тадқиқотчилик кўникмаларини ривожлантиришга қаратилган таълим ташаббуси. У 2026 йил апрель ойидан буён Ўзбекистон Республикаси Инсон ҳуқуқлари бўйича миллий маркази ва Centre for Development and Justice International (CDJI) ҳамкорлигида амалга оширилмоқда. Ўзбекистонда лойиҳа илк бор инсон ҳуқуқлари соҳасидаги тадқиқотлар бўйича миллий танлов шаклида ташкил этилди.

Лойиҳалар устида ишлаш жараёнида талабалар назарий билимларини муайян муаммоларни ўрганишда қўллади, мустақил тадқиқот олиб борди ва уларнинг ечими бўйича асосланган таклифлар тайёрлади. Бу жараёнда уларга ўз олий таълим муассасалари ўқитувчилари ҳамда Тилбург университети (Нидерландия) профессорлари маслаҳат берди. Маҳаллий ва хорижий устозлар иштироки талабаларга тадқиқотларни тайёрлашда турли академик тажрибаларга таяниш имконини берди.