Академия магистратурасида ўқув йилининг бошланиши: янги марралар

Ўзбекистон Республикаси Бош прокуратураси Академиясининг магистратурасига кириш имтиҳонлари якунланди, кириш имтиҳонларини муваффақиятли топширган 30 нафар тингловчи магистратурага қабул қилинди.

2020 йилнинг 9 октябрь куни янги ўқув йилининг очилиши муносабати билан тадбир бўлиб ўтди. Тадбирда Академия раҳбарияти, ходимлари ва профессор-ўқитувчилари ҳамда магистратура тингловчилари иштирок этдилар.

Академия бошлиғи Е.В.Коленко йиғилганларга табрик сўзи билан мурожаат қилди, у ҳар томонлама билим ва юқори малакага эга, халқаро стандартларга жавоб берадиган ва ўз касбига садоқатли янги кадрларни тайёрлаш муҳимлигини таъкидлади, шунингдек магистратурада ўқитишнинг асосий тамойиллари, амалий хусусияти ва прокуратура органларининг амалий фаолияти билан узвий боғлиқлиги ҳақида тўхталди.

Академиянинг профессор-ўқитувчилари тингловчиларни амалиётда кенг қўлланиладиган назарий билимларни такомиллаштиришга, илмий-тадқиқот фаолиятини олиб боришга, академик мобилликни амалга оширишга қаратилган ўқитиш усуллари ва бошқа имкониятлар билан таништирдилар.

Тингловчилар ўқиш ва келгусида профессионал ўсиш траекториясини самарали ташкил этишга кўмак берадиган зарур маълумотларга эга бўлдилар.