Ҳуқуқий билимларни яратиш, амалиёт билан боғлаш ва кенг жамоатчиликка замонавий шаклларда етказиш – Ҳуқуқни муҳофаза қилиш академияси ҳамда Адлия вазирлиги ҳузуридаги «Адолат» миллий ҳуқуқий ахборот маркази ҳамкорлигининг устувор йўналишлари сифатида муҳокама қилинди.

12 октябрь куни Академияда бўлиб ўтган учрашувда илмий-амалий шарҳлар ва ўқув адабиётларини тайёрлашдан тортиб, ҳуқуқий медиа маҳсулотлар ва таҳлилий нашрларгача бўлган ҳамкорлик истиқболлари кўриб чиқилди. Бунда Академиянинг илмий салоҳияти ва ҳуқуқни муҳофаза қилиш амалиёти тажрибасини бирлаштириш имкониятларига алоҳида эътибор қаратилди.

2022 йилда тузилган келишув доирасида томонлар «Тезкор-қидирув фаолияти тўғрисида»ги ва «Ички ишлар органлари тўғрисида»ги қонунларга илмий-амалий шарҳлар, шунингдек, «Криминология» дарслигини нашр этган. Учрашувда ушбу ҳамкорликни янги нашрлар, медиа лойиҳалар ва илмий мулоқот билан давом эттириш, жумладан, 25 ноябрь куни онлайн ўтказилиши режалаштирилган халқаро конференцияда иштирок этиш масалалари муҳокама қилинди.