Ҳуқуқни муҳофаза қилиш академиясида Ҳиндистон Миллий суд экспертизалари университети (NFSU) ва Кипр Республикаси Лимассол университети вакиллари билан учрашув бўлиб ўтди. 

Академия бошлиғининг биринчи ўринбосари Е.В. Коленко раҳбарлигида ўтган мулоқотда кадрлар тайёрлашда тажриба алмашиш, қўшма ўқув машғулотлари ва малака ошириш курсларини ташкил этиш масалалари муҳокама қилинди.

Учрашувда NFSU ижрочи регистратори C.D. Jadeja ҳамда университетнинг Деҳли кампуси директори, Ҳуқуқ, суд адолати ва сиёсий тадқиқотлар мактаби декани, профессор Purvi Pokhariyal иштирок этди. Шунингдек, Криминологик тадқиқотлар ва ишланмалар маркази бош директори Chetan Mukundan ва Лимассол университетининг халқаро алоқалар ва илмий тадқиқотлар бўйича проректори профессор Demetra Fr. Sorvatzioti қатнашди.

Меҳмонлар Академияда таълим олиш учун яратилган шароитлар, рақамли таълим платформалари, илмий-тадқиқот марказлари ва Рақамли криминалистика илмий-тадқиқот институти фаолияти билан танишдилар. Улар Академиядаги имкониятларга юқори баҳо бердилар.

Учрашув якунида томонлар кадрлар тайёрлашда тажриба алмашиш, қўшма ўқув машғулотлари ва малака ошириш курсларини ташкил этиш бўйича келгуси ҳамкорлик режаларини келишиб олдилар.