Оилавий ва маиший зўравонликнинг олдини олиш, жабрланганларни ҳимоя қилиш ва такрорий ҳуқуқбузарликларга қарши самарали чоралар кўриш ҳуқуқий, криминологик ва амалий ёндашувларнинг уйғунлигини талаб этади. Шу йўналишлардаги миллий ва хорижий тажриба, замонавий механизмлар ҳамда рақамли технологиялар имкониятлари Ҳуқуқни муҳофаза қилиш академиясида бўлиб ўтган халқаро илмий-амалий конференцияда муҳокама қилинди.
Конференция Академия амалга ошираётган оилавий ва маиший зўравонликка қарши курашиш самарадорлигини оширишга қаратилган инновацион дастурий таъминот ва платформани яратиш лойиҳаси доирасида ташкил этилди. Тадбирнинг мақсади – зўравонликнинг олдини олиш, жабрланганларни ҳимоя қилиш ва ҳуқуқбузарликларга қарши курашишнинг замонавий ҳуқуқий ҳамда амалий механизмларини миллий ва хорижий тажриба ва рақамли технологиялар асосида ишлаб чиқиш.
Иштирокчилар жиноят-ҳуқуқий сиёсатни, оилавий ва маиший зўравонлик билан боғлиқ жиноятларни тергов қилиш ва квалификациялаш амалиётини таҳлил қилдилар. Шунингдек, криминологик баҳолаш ва виктимологик профилактиканинг замонавий методологияси, жабрланганларни ҳимоя қилиш ҳамда аҳолининг, айниқса хотин-қизларнинг ҳуқуқий саводхонлигини ошириш механизмлари муҳокама қилинди. Ҳимоя чоралари ижросини рақамли назорат қилиш ва прокурор назоратини кучайтириш имкониятларига ҳам эътибор қаратилди.
Конференцияда Ҳуқуқни муҳофаза қилиш академияси раҳбарияти ва профессор-ўқитувчилари, Тошкент давлат юридик университети, Одил судлов академияси, Жамоат хавфсизлиги университети, Божхона институти ҳамда Адлия вазирлиги ҳузуридаги Юридик кадрларни қайта тайёрлаш ва малакасини ошириш институти мутахассислари қатнашди. Россия Федерацияси Ички ишлар вазирлигининг Нижегород академияси ва Янка Купала номидаги Гродно давлат университети олимлари онлайн иштирок этдилар.
Дастурдан етакчи олимлар ва амалиётчилар маърузалари ҳамда Академия докторантларининг тадқиқотларига бағишланган ёш олимлар сессияси ўрин олди. 30 дан ортиқ маъруза режалаштирилган конференцияда рақамли далилларни тўплаш, зўравонлик такрорланиш хавфини баҳолаш, сунъий интеллектдан фойдаланишнинг ҳуқуқий ва ахлоқий чегаралари, электрон мурожаатлар махфийлиги, электрон реестрлар ва идоралараро электрон ҳамкорлик масалалари кўриб чиқилди. Ногиронлиги бўлган шахсларнинг рақамли хизматлардан фойдаланиш имкониятлари ҳам муҳокама қилинди.
Муҳокамалар доирасида лойиҳа бўйича ишлаб чиқилаётган «TAYANCH» рақамли платформасининг илмий-ҳуқуқий асослари ва техник топшириғи олимлар ҳамда амалиётчилар иштирокида кўриб чиқилди. Конференцияда билдирилган таклифлар техник топшириқни такомиллаштириш, қонунчилик ва ҳуқуқни қўллаш амалиёти юзасидан илмий асосланган тавсиялар ишлаб чиқишда умумлаштирилади. Жабрланганлар ҳақидаги маълумотлар дахлсизлиги ва сунъий интеллектдан фойдаланишнинг ҳуқуқий чегаралари бўйича ёндашувларни аниқлаштириш ҳам кўзда тутилган.
Кейинги босқичларда платформани амалиётга жорий этишга тайёрлаш, ҳуқуқни муҳофаза қилувчи органлар ўртасида электрон ҳамкорлик механизмларини ишлаб чиқиш ва ходимлар учун рақамли воситалардан фойдаланиш бўйича ўқув машғулотларини ташкил этиш режалаштирилган. Хорижий ҳамкорлар билан қўшма тадқиқотларни давом эттириш ва ёш олимларнинг илмий натижаларини амалиётга татбиқ этиш ҳам белгиланган.
