Ҳуқуқни муҳофаза қилиш академиясига Буюк Британия ва Шимолий Ирландия Бирлашган Қироллиги Ташқи ишлар, ҳамдўстлик ва тараққиёт маҳкамаси департаменти бошлиғи Н. Уиган бошчилигидаги делегация ташриф буюрди.

Учрашувда Академиянинг тузилмаси ва фаолият йўналишлари, прокуратура ва тергов органлари ходимларини тайёрлаш, қайта тайёрлаш ҳамда малакасини ошириш тизими ҳақида маълумот берилди. Томонлар амалга оширилаётган қўшма лойиҳалар ва ҳамкорликни янада ривожлантириш масалаларини муҳокама қилдилар. Делегация аъзолари йўлга қўйилган ҳамкорлик учун миннатдорлик билдириб, қўшма лойиҳаларни юқори баҳоладилар.

Ташриф доирасида делегация вакиллари Академияда ташкил этилаётган «Молиявий излардан суддаги далилларгача: жиноий фаолиятдан олинган даромадларни легаллаштириш билан боғлиқ ишларни тергов қилиш ва исботлаш» мавзусидаги минтақавий симуляцион ўқув тренинги билан танишдилар. Тренинг Буюк Британиянинг молиявий кўмагида БМТнинг Наркотиклар ва жиноятчилик бўйича бошқармаси билан ҳамкорликда ўтказилмоқда.

Ташриф якунида томонлар ҳамкорликни давом эттириш ва қўшма ташаббусларни қўллаб-қувватлашга тайёр эканликларини билдирдилар.