Ҳуқуқни муҳофаза қилиш академияси Марказий Осиё давлатларининг ҳуқуқни муҳофаза қилувчи органлари ва ихтисослашган таълим муассасалари билан кадрлар тайёрлаш соҳасидаги ҳамкорликни изчил ривожлантирмоқда. Қўшма таълим ташаббуслари, тажриба алмашинуви ва халқаро экспертлар иштирокидаги амалий машғулотлар ушбу ишнинг ўзаро боғлиқ йўналишларидир. Академияда ўтказилган уч кунлик минтақавий тренинг ҳам шу ҳамкорлик доирасида ташкил этилди.

БМТнинг Наркотиклар ва жиноятчилик бўйича бошқармаси билан ҳамкорликда, Буюк Британия молиявий кўмагида ўтказилган тренинг «Молиявий излардан суддаги далилларгача: жиноий даромадларни, шу жумладан виртуал активлар билан боғлиқ операцияларни легаллаштиришни тергов қилиш ва исботлаш» мавзусига бағишланди.

Унда Академия раҳбарияти, Буюк Британиянинг Тошкент ва Душанбе шаҳарларидаги элчихоналари, БМТ вакиллари, халқаро экспертлар ҳамда Ўзбекистон, Қозоғистон ва Қирғизистон ҳуқуқни муҳофаза қилувчи органлари мутахассислари иштирок этди.

Уч кун давомида иштирокчилар параллел молиявий тергов ўтказиш, халқаро пул ўтказмалари ва криптовалюта операцияларини таҳлил қилиш, молиявий разведка маълумотларидан фойдаланиш, жиноий активларни аниқлаш ва қайтариш бўйича амалий машғулотларда қатнашдилар. Тренинг дастури ўнлаб мавзули машғулот ва амалий казусларни қамраб олди.

Буюк Британия ва Шимолий Ирландия Бирлашган Қироллиги Ташқи ишлар, ҳамдўстлик ва тараққиёт маҳкамаси департаменти бошлиғи Н.Уиган бошчилигидаги делегация тренинг жараёни билан танишиб, иштирокчилар билан мулоқот қилди. Мулоқот давомида делегация раҳбари тадбирнинг минтақавий даражада ўтказилгани ва унда хорижий экспертлар иштирок этганини эътироф этиб, соҳадаги халқаро ҳамкорликни янада ривожлантириш истиқболлари юзасидан фикр билдирди.