Ўзбек тили байрами ва ўзбек тилига давлат тили мақоми берилганининг 37 йиллиги муносабати билан Ўзбекистон Республикаси Ҳуқуқни муҳофаза қилиш академиясида «Ўзбек тили – миллат ғурури ва маънавият кўзгуси» мавзусида маънавий-маърифий тадбир ўтказилди. Унда профессор-ўқитувчилар, тилшунос олимлар, талабалар ва таклиф этилган соҳа мутахассислари иштирок этди.

Мутахассислар ўзбек тилининг асрлар давомида шаклланиши, Алишер Навоий ва бошқа мутафаккирларнинг тилимиз бойлиги ва жозибасини намоён этишдаги ўрни, шунингдек, унинг тарихий ривожланиш босқичлари ҳақида сўз юритди. Давлат тилининг мустақиллик йилларидаги ҳуқуқий кафолатлари, ҳуқуқни муҳофаза қилиш ва суд-ҳуқуқ тизимида ўзбек тилини тўғри қўллаш, ижро ҳужжатлари ва иш юритишда тил қоидаларига риоя этиш масалалари ҳам муҳокама қилинди.

Мулоқотда она тилининг миллий ўзликни англаш, аждодлар мероси ва маънавий қадриятларни авлодларга етказишдаги аҳамияти алоҳида таъкидланди. Тадбир якунида талабалар она тилини мадҳ этувчи шеърларни ижро этди.