Жиззах вилоятида Ўзбекистон Республикаси Ҳуқуқни муҳофаза қилиш академияси ташаббуси билан вилоят ҳокимлиги, прокуратураси ва Ёшлар ишлари агентлиги вилоят бошқармаси ҳамкорлигида ташкил этилган «Хавфсиз маҳалла билимдони» интеллектуал танловининг финал босқичи ўтказилди. Унда туман босқичларида биринчи ўринни эгаллаган 13 та жамоа иштирок этди.

Танлов вилоятнинг 304 та маҳалласида фаолият юритаётган «маҳалла еттилиги» аъзоларининг хавфсиз муҳитни яратиш, жиноятчиликнинг барвақт олдини олиш ва ҳуқуқбузарликлар профилактикасининг ташкилий-ҳуқуқий асосларига оид билим ва кўникмаларини оширишга қаратилди. Биринчи босқичда 304 та маҳалла жамоаси туман миқёсида беллашди. Жамоалар маҳалла раислари, профилактика инспекторлари, хотин-қизлар фаоллари, ёшлар етакчилари, ҳоким ёрдамчилари, солиқ инспекторлари ва ижтимоий ходимлардан шакллантирилди.

Танлов саволлари ва топшириқлари Академиянинг Жиззах вилояти маҳаллаларида олиб борган ўрганишлари ҳамда ишлаб чиққан илмий тавсиялари асосида тузилди. Улар маҳалланинг криминоген портрети, конфликтология ва низоларни ҳал этиш тактикаси, стресс-менежмент, ностандарт вазиятларда руҳий барқарорлик, кибергигиена ва кибертаҳдидлардан ҳимояланиш, кибербуллинг, оилавий зўравонлик, коррупциянинг олдини олиш механизмлари ва ҳалоллик маданияти каби мавзуларни қамраб олди.

Мантиқий ва вазиятли саволлар, кейслар орқали иштирокчиларнинг ҳуқуқий маданияти, девиант хулқ-атвор психологиясини тушуниши, низоларни барвақт ҳал этиши ва жамоавий ҳамкорлик кўникмалари баҳоланди.

Якуний натижаларга кўра, Арнасой туманидаги «Бобур» маҳалласи жамоаси биринчи, Жиззах шаҳридаги «Турон» маҳалласи жамоаси иккинчи, Шароф Рашидов туманидаги «Қаҳрамон» маҳалласи жамоаси учинчи ўринни эгаллади. Танлов низомига мувофиқ, ғолиб жамоалар ташкилотчиларнинг дипломлари ва қимматбаҳо эсдалик совғалари билан тақдирланади.