Ўзбекистон Республикаси Ҳуқуқни муҳофаза қилиш академияси ҳузуридаги DSc.24/2026.31.01.Yu.01.02 рақамли Илмий кенгаш мажлисида Академия ҳузуридаги Рақамли криминалистика илмий-тадқиқот институти Кибержиноятларга қарши курашиш ва рақамли терговга кўмаклашиш маркази бошлиғи Кудратов Бунёд Бахтиёровичнинг диссертация иши ҳимояси бўлиб ўтди. Диссертация «Ахборот тизими (технологиялари)дан фойдаланиб содир этилган фирибгарлик жиноятларини тергов қилишни такомиллаштириш» мавзусида бўлиб, 12.00.09 – «Жиноят процесси. Криминалистика, тезкор-қидирув ҳуқуқи ва суд экспертизаси» ихтисослиги бўйича юридик фанлар бўйича фалсафа доктори (PhD) илмий даражасини олиш учун тақдим этилган.

Тадқиқотда электрон маълумотларни мақбул далил сифатида эътироф этиш шартлари асослантирилиб, рақамли криминалистика соҳасида сертификатланган мутахассисларнинг ягона электрон реестрини юритиш, банк карталаридан маблағларни фирибгарлик йўли билан талон-торож қилиш жиноятларини тергов қилиш алгоритмлари ҳамда крипто-активларни олиб қўйиш ва хатлаш тартибига доир ишланмалар тақдим этилди.

Амалий натижалар сифатида тергов амалиёти учун услубий қўлланмалар ва процессуал ҳужжатлар намуналари ишлаб чиқилиб, барча тергов органларига тарқатилган. Шунингдек, Олий суд Пленуми қарори лойиҳаси ҳамда рақамли далиллар билан ишлаш тизимини такомиллаштиришга қаратилган қонун лойиҳаси ишлаб чиқилган.

Илмий кенгаш қарорига кўра, Кудратов Бунёд Бахтиёрович юридик фанлар бўйича фалсафа доктори (PhD) илмий даражасини олишга муносиб деб топилди. Ҳамкасбимизни диссертация ишини муваффақиятли ҳимоя қилгани билан табриклаймиз ва илмий фаолиятида муваффақиятлар тилаймиз!