Ўзбекистон Республикаси Ҳуқуқни муҳофаза қилиш академиясида «Илмий-тадқиқот фаолиятининг долзарб масалалари: замонавий талаблар ва имкониятлар» мавзусида республика илмий-амалий конференцияси ўтказилди. Унда илмий кадрлар тайёрлаш, олий таълимдан кейинги таълимни такомиллаштириш ва академик ҳалолликни таъминлаш масалалари кўриб чиқилди.

Конференция Академия ташаббуси билан Фанлар академияси ҳузуридаги Олий аттестация комиссияси, Инновацион ривожланиш агентлиги, Тошкент давлат юридик университети, Одил судлов академияси, Жамоат хавфсизлиги университети ҳамда Давлат божхона қўмитасининг Божхона институти ҳамкорлигида ташкил этилди. Унда юридик таълим ва илмий тадқиқот соҳалари вакиллари, ёш олимлар ҳамда докторантлар иштирок этди.

Анжуман доирасида олий таълимдан кейинги таълимни такомиллаштириш, илмий кадрлар тайёрлашнинг замонавий механизмлари ва устувор йўналишлари, шунингдек, Академияда илмий-инновацион тадқиқотларни ривожлантириш масалалари муҳокама қилинди. Иштирокчилар академик ҳалолликни таъминлаш, плагиат ва маълумотларни сохталаштиришга қарши курашишнинг ҳуқуқий механизмлари ҳамда илмий муассасалар, олий таълим ташкилотлари ва ёш олимлар ўртасидаги ҳамкорликни мустаҳкамлаш юзасидан фикр алмашдилар.

Асосий маърузалар билан Олий аттестация комиссияси бош илмий котиби, профессор А.Шермухамедов ва Инновацион ривожланиш агентлиги вакили Ж.Шарипов сўзга чиқди. Шунингдек, Тошкент давлат юридик университети, Жамоат хавфсизлиги университети, Божхона институти ва Академия олимларининг маърузалари тингланди.

Конференция муҳокама ва савол-жавоблар билан якунланди. Иштирокчилар илмий-тадқиқот фаолияти ва илмий кадрлар тайёрлаш тизимини такомиллаштириш юзасидан фикр алмашдилар.